Nexia avtomobili kechikkani uchun buxorolik fuqaroga qo‘shimcha qariyb 11 mln so‘m undirib berildi
Agar avtomashina o‘z vaqtida yetkazib berilmasa, korxona tomonidan har bir kechiktirilgan kun uchun 0,4 foiz miqdorida penya to‘lanishi shartnomada belgilangan, bu haqda O‘zA xabar qiladi.
Buxoro tumani iste’molchilar huquqlarini himoya qilish jamiyatiga Vobkent tuman Kulolchi ko‘chasi 65-uyda yashovchi fuqaro Sa’dulla Navro‘zov murojaat qilgan. U o‘z murojaatida “Sitora-avto savdo” MChJ bilan Nexia 3 AV-CS16 rusumli avtomashina sotib olish uchun belgilangan to‘lovni amalga oshirib, shartnoma tuzgan. Shartnomaga asosan, 2019-yil 1-yanvarga qadar avtomashina fuqaroga yetkazib berilishi belgilangan bo‘lgan. Agar o‘z vaqtida yetkazib berilmasa, korxona tomonidan har bir kechiktirilgan kun uchun 0,4 foiz miqdorida penya to‘lanishi shartnomada belgilab qo‘yilgan. Ammo iste’molchiga shartnomada ko‘rsatilgan muddatda avtomashina berilmagan.
Murojaat viloyat jamiyatlari mutaxassislari tomonidan o‘rganilib, natijasida fuqaroga Nexia 3 AV-CS16 avtomoshinasi olib berildi, shuningdek, iste’molchining arizasiga binoan, kechiktirilgan muddat bo‘yicha penya hisoblanib, korxona tomonidan fuqaroga o‘n million to‘qqiz yuz o‘n ming to‘rt yuz o‘n sakkiz so‘m penya to‘landi.
