Noqonuniy lochin ovini rejalashtirgan Saudiya Arabistoni fuqarosi Toshkent aeroportida qo‘lga olindi

Noqonuniy ravishda lochin ovlamoqchi bo‘lgan Saudiya Arabistoni fuqarosi Toshkent aeroportida qo‘lga olindi. Bu haqda “Podrobno.uz” xabar berdi.

“4-aprel kuni Ekologiya va atrof-muhitni muhofaza qilish davlat qo‘mitasi va bojxona xizmati birgalikda Dubaydan qaytayotgan Saudiya Arabistoni fuqarosi yo‘qolib borayotgan yovvoyi fauna va flora turlari bo‘yicha xalqaro savdo-sotiq faoliyati tartibini buzgan holda, ikkita lochinni olib kirishiga to‘sqinlik qildi”, — deyiladi xabarda.

Yirtqich qushlarni ovlash uchun chet el fuqarosi o‘zi bilan tuzoq ham olib kelgan. Ehtimol, qushlarni O‘zbekistonga olib kelishning maqsadi – lochin ovine tashkillashtirish bo‘lgan.

Hozirgi vaqtda qushlar vaqtincha musodara qilinib, maxsus ixtisoslashtirilgan qarovxonada saqlashga topshirilgan.

Shuningdek, chet el fuqarosini qonun bilan belgilangan tartibda javobgarlikka tortish masalasi ham hal etiladi.