Kaliforniyada bemorga uning o‘limi haqida robot ma’lum qiladi

Kaliforniyaning Frimont shahridagi Kaiser Permanente Medical Center kasalxonasida davolanayotgan bemorning o‘limi haqida robot orqali ma’lum qilindi, deb yozadi Forum Daily.

78 yoshli Ernest Kintana o‘limi haqida robot orqali bilganidan keyin ertasi kuni vafot etgan.

Ma’lum bo‘lishicha, Ernest Kintana bir necha yillar davomida nafas olishni qiyinlashtiruvchi surunkali obsturkiv o‘pka kasalligi bilan og‘rigan.

Uning nabirasi Annalisiya Uilxarm shifoxonaning bunday xatti-harakatidan norozi bo‘lib CNN telekanaliga murojaat qilgan.

Annalisiya Uilxarm bobosining o‘limi haqida bilganini, ammo xabarning bunday ko‘rinishda taqdim etilganidan g‘azabda ekanini ma’lum qilgan. Bir necha kun avval shifokorlar bemorning ahvolini aniqlash maqsadida tashxis o‘tkazgan. Shu kuni Uilxarm onasi va 58 yoshli buvisini biroz dam olib kelish maqsadida uyga yuborgan.

Ular ketgan vaqtda xonaga hamshira hamrohligida robot kirib kelgan. Hamshira indamagan, robot ekranida esa shifokor paydo bo‘lib bo‘lib, gapirishni boshlagan. Uilxarmning ta’kidlashicha, u shifokorning kimligi va qayerda ekanligini bilmagan.

Shifokor davolash usullari yo‘qligi, bemorning ahvolini yengillashtirishning yagona yo‘li morfin berish ekanligi, biroq u nafas olishni qiyinlashtirishini aytgan. “U uyga qaytadimi-yo‘qmi biror narsa deya olmayman, lekin ayni paytda eng yaxshi yo‘l morfin berish”, — degan ekrandagi shifokor.

Bemor shifokorning gaplarini yaxshi eshitmagani sababli uning nevarasi bobosining o‘limi haqida o‘zi aytishga majbur bo‘lgan va onasi bilan buvisini kasalxonaga chaqirtirgan.

CNN tomonidan yuborilgan bayonotda kasalxona vakili bemorning oila a’zolariga chuqur ta’ziya bildirgan. Ularning aytishicha, shifokorning video tashrifi avvalgi tashriflar davomi bo‘lib, dastlabki tashxisni qo‘yishda foydalanilmagan.

“Agar oddiy xabarni yetkazmoqchi bo‘lsangiz mayli, lekin o‘pkaning og‘irlashgani, o‘limgacha morfin qabul qilish kerakligini aytish kerak bo‘lsa, buni mashina emas, shifokorning shaxsan o‘zi aytishi kerak”, — deb javob bergan Ernest Kintananing rafiqasi.