Joriy yil 13—15-mart kunlari “O‘zekspomarkaz”da AgroWorld Uzbekistan 2019 xalqaro ko‘rgazmasi bo‘lib o‘tadi. Ko‘rgazmada jahonning 20 ta mamlakatidan 150 ta kompaniya ishtirok etadi. Bu haqda “Daryo”ga Qishloq xo‘jaligi vazirligi matbuot xizmati ma’lum qildi.
Ko‘rgazmada chorvachilik, parrandachilik, issiqxona xo‘jaliklari uchun uskunalar va texnologiyalar, yem-xashak va don sanoati uchun yechimlar taqdim etiladi. Unda ilk marotaba qatnashayotgan 60 dan ortiq ishtirokchi agrar sanoatning turli tarmoqlari uchun uskunalarni ishlab chiqaruvchilardir.
An’anaga ko‘ra, ko‘rgazmaning ikkinchi kuni O‘zbekiston fermerlar, dehqon xo‘jaliklari va tomorqa yer egalari kengashi ko‘magida “Fermerlar kuni” o‘tkaziladi. Shu kuni tajriba almashish va ko‘rgazmada taqdim etilgan mahsulotlarning keng turlarini ishlab chiqaruvchi va yetkazib beruvchi korxonalar bilan bevosita muloqot qilish uchun respublikaning barcha viloyatlaridan agrar soha mutaxassislari keladi.
Ko‘rgazma ilg‘or texnologiyalarni jalb qilish orqali agrosanoat sektorida xalqaro hamkorlikni yanada rivojlantirish, tajriba almashish, O‘zbekistonning qishloq xo‘jaligi sohasining investitsion jozibadorligini oshirishga turtki bo‘lib xizmat qilishi kutilmoqda.
Izoh (0)