Namanganda Xitoy kompaniyasi ekoshahar, tayvanliklar esa 20 mln tovuqli parrandachilik klasteri qurmoqchi

Xitoyning Zhongye Wanda kompaniyasi rahbari Fenju Jiang, Tayvanning Kai Shing Trading kompaniyasi rahbari Ten Syuekay va Malayziya xalqaro savdo assotsiatsiyasi (SMITA) katta maslahatchisi Tomas Su ishchi tashrif bilan Namanganga keldi, deya xabar bermoqda O‘zA.

Viloyat hokimligida bo‘lib o‘tgan uchrashuvda xorijlik investorlar tomonidan qurilish yo‘nalishidagi investitsiya loyihalari taqdim etilgan.

Jumladan, Zhongye Wanda kompaniyasi Namangan shahrida mehmonxona kompleksi, biznes-apartamentlar, 20 qavatli ofis binosini o‘z ichiga olgan aqlli ekoshahar qurish loyihasini namoyish etgan.

“Umumiy qiymati 70 million dollar bo‘lgan bu loyiha 20 gektar maydonda barpo etilishi ko‘zda tutilgan”, — deyiladi agentlik axborotida.

Tayvanning Kai Shing Trading kompaniyasi esa katta maydonda tovuq boqish, tovuq go‘shtini qayta ishlash va tovuq essensiyasi ishlab chiqarishni o‘z ichiga olgan parrandachilik klasteri loyihasini taqdim etgan.

Xabar berishlaricha, umumiy qiymati 40 million dollar bo‘lgan mazkur loyiha hayotga tatbiq etilsa, yiliga 20 million bosh tovuq yetishtirib, uning go‘shtini qayta ishlash imkoniyatlari yaratiladi.

“Har ikki loyiha viloyat hokimligi tomonidan ijobiy qabul qilindi va hamkorlik taklifi bilan kelgan sarmoyadorlarga qurilish uchun yer maydonlari ko‘rsatildi. Uchrashuvda har ikki kompaniya bilan investitsion shartnoma imzolashga kelishib olindi”, — deb yozadi O‘zA.