“Byornli”—“Tottenhem” uchrashuvida O‘zbekistonga sayohat qilishga undovchi reklamalar paydo bo‘ldi

Bugun, 23-fevral kuni bo‘lib o‘tgan Angliya premyer ligasining 27-turidan o‘rin olgan “Byornli”–“Tottenhem” uchrashuvi vaqtida stadion chetidagi elektron reklamalar taxtachasida O‘zbekistonga sayohat qilishni targ‘ib etuvchi reklamalar namoyish etildi, deb yozadi “Kun.uz”.

Turizmni rivojlantirish davlat qo‘mitasining ma’lum qilishicha, qo‘mita vakillari Angliya premyer ligasining ikkita o‘yinida LED-ekranlarda O‘zbekiston haqida reklama namoyish qilish uchun “Lagardere sport” kompaniyasi bilan muzokaralar o‘tkazgan. Natijada 23-fevral kungi “Byornli”—“Tottenhem” (2:1) va “Lester”—“Kristal Pelas” (22:30 da boshlanadi) o‘yinlari vaqtidagi reklama kampaniyasi bo‘yicha kelishuvga erishilgan.

Reklama matnida “Life is too short not to visit Uzbekistan” deyilgan bo‘lib, jumla “O‘zbekistonga safarni keyinga qoldirish uchun umr juda qisqalik qiladi” ma’nosini anglatadi. Boshqa bir matnda esa “For 64 countries — Uzbekistan — Visa free” yozuvi paydo bo‘ldi, ya’ni e’londa 64 davlat fuqarolari uchun O‘zbekistonga kirish vizasi talab etilmasligi ham targ‘ib qilindi.