Бугун, 23 февраль куни бўлиб ўтган Англия премьер лигасининг 27-туридан ўрин олган «Бёрнли»–«Тоттенҳэм» учрашуви вақтида стадион четидаги электрон рекламалар тахтачасида Ўзбекистонга саёҳат қилишни тарғиб этувчи рекламалар намойиш этилди, деб ёзади «Kun.uz».
Туризмни ривожлантириш давлат қўмитасининг маълум қилишича, қўмита вакиллари Англия премьер лигасининг иккита ўйинида LED-экранларда Ўзбекистон ҳақида реклама намойиш қилиш учун «Lagarderе sport» компанияси билан музокаралар ўтказган. Натижада 23 февраль кунги «Бёрнли»—«Тоттенҳэм» (2:1) ва «Лестер»—«Кристал Пэлас» (22:30 да бошланади) ўйинлари вақтидаги реклама кампанияси бўйича келишувга эришилган.
Реклама матнида «Life is too short not to visit Uzbekistan» дейилган бўлиб, жумла «Ўзбекистонга сафарни кейинга қолдириш учун умр жуда қисқалик қилади» маъносини англатади. Бошқа бир матнда эса «For 64 countries — Uzbekistan — Visa free» ёзуви пайдо бўлди, яъни эълонда 64 давлат фуқаролари учун Ўзбекистонга кириш визаси талаб этилмаслиги ҳам тарғиб қилинди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)