Fuqarolarning 2 mlrd 800 mln so‘mdan ortiq mablag‘ini firibgarlik bilan qo‘lga kiritgan farg‘onalik “Ahmadboylar” 8 yilga qamaldi

Jinoyat ishlari bo‘yicha Quvasoy shahar sudida 30 nafarga yaqin fuqaroning 2 milliard 800 million so‘mdan ortiq mablag‘ini firibgarlik yo‘li bilan qo‘lga kiritgan Saminjon Umaraliyev hamda Sharobjon Arslonovning jinoyat ishi sudya Sardorbek Yuldashev raisligida ko‘rib chiqilgan. Bu haqda “Daryo” muxbiri Azizjon Ermatov xabar bermoqda.

Sud ishini ko‘rib chiqish davomida aniqlanishicha, Saminjon Umaraliyev firibgarlik yo‘li bilan moddiy daromad orttirish ilinjida Sharobjon Arslonov bilan oldindan jinoiy til biriktirgan. Ular fuqarolardan avtomashinalarni pulini 30–40 kunda berish sharti bilan qimmatroq narxda sotib olib, boshqa fuqarolarga arzon narxda naqd pulga sotish bilan shug‘ullangan.

Jumladan, ular Yu.R. o‘ziga tegishli Spark avtomashinasini sotmoqchi ekanidan xabar topib, u bilan uchrashgan. Yu.R.dan avtomashinasini 5200 dollarga, pulini ikki oy ichida berish sharti bilan, sotib olgan va bu haqida tilxat yozib bergan. So‘ngra mazkur avtomashinani dastlabki tergov harakatlari davomida aniqlashning imkoni bo‘lmagan shaxsga 4800 dollarga sotib, pullarini muqaddam boshqa fuqarolardan qarzga sotib olgan mashinalari hisobiga tarqatib yuborgan. Yu.R.ga va’da qilingan 5200 dollarni bermagan.

Firibgarlar fuqaro A.I.ning Lacetti avtomashinasini 8000 dollarga, pulini ikki oy ichida to‘liq to‘lash sharti bilan, sotib olgan. Ushbu avtomashinani ham boshqa shaxslarga sotib yuborib, oradan 2 oy vaqt o‘tishiga qaramasdan, A.I.ga va’da qilingan 8000 dollarni bermagan.

Yana bir holatda Umaraliyev va Arslonov V.M. bilan Captiva avtomashinasini 22650 dollarga sotib olishga kelishgan. Captiva uchun V.M.ga 3000 dollar berib, qolgan 19650 dollarni 40 kun ichida to‘liq to‘lashni va’da qilgan. Biroq, oradan 40 kun o‘tsa-da, V.M.ga 19650 dollarni bermagan. Captiva’ni esa U.T.ga 18800 dollarga sotib yuborgan. Sotishganu, lekin avtomashinani U.T.ning nomiga rasmiylashtirib bermagan.

Ustamon firibgarlar shu “sxema” orqali 30 nafarga yaqin fuqaroga 2 milliard 800 million so‘mdan ortiq moddiy zarar yetkazgan.

Sud hukmiga ko‘ra, Saminjon Umaraliyev va Sharobjon Arslonov Jinoyat Kodeksining 168-moddasi 4-qismi “a” bandi (juda ko‘p miqdorda firibgarlik) bilan aybli deb topilib, ularga 8 yil muddatga ozodlikdan mahrum qilish jazosi tayinlandi.