Farg‘ona viloyati Quva tumanida Xalq banki xodimlari tomonidan sodir etilgan jinoyat ishi yuzasidan oqlov hukmi bekor qilinib, aybdorlarga tegishli jazo tayinlandi. Bu haqda “Daryo” muxbiri Azizjon Ermatov xabar bermoqda.
Xalq bankining Quva filiali boshqaruvchisi M.B., bosh hisobchi N.X., g‘azna mudiri Z.A. o‘zlariga yuklatilgan vazifalarni lozim darajada bajarmay jinoyat sodir etgan. Ular 2017-yil 26-may kuni yakuni bo‘yicha qoldiqda qolgan 38 ming 867 AQSh dollari miqdoridagi valyuta mablag‘larining butligi va daxlsizligini ta’minlash choralarini ko‘rmaganliklari oqibatida kamomadga yo‘l qo‘ygan.
Jinoyat ishlari bo‘yicha Quva tuman sudi tomonidan sudlanuvchilar harakatida jinoyat alomatlari yo‘qligi ko‘rsatilib, oqlov hukmi chiqarilgan. Sudning mazkur oqlov hukmi apellyatsiya protestiga asosan Farg‘ona viloyat sudida ko‘rilib, hukm o‘zgarishsiz qoldirilgan.
Jinoyat ishi Respublika Bosh prokuraturasining protestiga asosan Oliy sudda ko‘rib chiqildi. Natijada, ishni ko‘rib chiqishda sud qonun talablarini bajarmasdan, ish holatlariga obyektiv baho bermay, uni bir tomonlama ko‘rib chiqib, sudlanuvchilar tomonidan sodir etilgan jinoyat ishi materiallari bilan to‘liq isbotlangani holatlariga e’tibor qaratmagani uchun apellyatsiya ajrimi bekor qilingan.
Farg‘ona viloyat sudi apellyatsiya instansiyasining 2019-yil 17-yanvardagi yangi ajrimi bilan oqlov hukmi bekor qilinib, sudlanuvchilarga tegishli jazolar tayinlandi hamda ulardan 38 ming 867 AQSh dollarini undirish belgilandi.
Eslatib o‘tamiz, 5-fevral kuni Xalq bankining Farg‘ona viloyati, Yozyovon tumanidagi filialidan 100 ming dollar naqd pul yo‘qolgandi. Holat yuzasidan Jinoyat Kodeksining 169-moddasi 4-qismi “a” bandi bilan (o‘g‘rilik, juda ko‘p miqdorda) jinoyat ishi qo‘zg‘atilgan.
Izoh (0)