Jinoyat ishlari bo‘yicha Toshkent shahar Yashnobod tuman sudida sudlanuvchi M.S. ga tegishli jinoyat ishi ko‘rib chiqildi, deb yozadi O‘zA.
Sud hukmiga ko‘ra, M.S 2018-yil 1-noyabr kuni 152-sonli maktab oldida voyaga yetmagan K. N.ning bo‘layotgan voqeani to‘liq anglab yetish qobiliyatiga ega emasligidan foydalangan holda, aldov yo‘li bilan qulog‘idagi 1 million 250 ming so‘mlik tilla ziraklarini yechib oladi. Ushbu ziraklarni K. N.ning sumkasiga solib qo‘ygandek harakat qilib, o‘ziga olib qoladi. Ya’ni o‘zganing mulkini yashirin ravishda talon-toroj qilib, voqea joyidan yashirinadi.
Bundan tashqari, M.S 2018-yil 16-noyabr kuni aldov yo‘li bilan voyaga yetmagan M.I. va M. T.ning qulog‘ida bo‘lgan har birining narxi 500 ming so‘mlik tilla ziraklarni yechib olib, o‘rniga xuddi shunga o‘xshash sariq metalldan yasalgan ziraklarni ularning sumkalariga solib qo‘yadi va voqea joyidan yashirinadi.
Sud majlisida sudlanuvchi aybiga to‘liq iqror bo‘ldi.
M.S.ga jazo tayinlashda uning sodir qilgan jinoyatiga to‘liq iqrorligi, moddiy zarar to‘liq qoplanganligi, muqaddam sudlanmaganligi, oilaviy va moddiy ahvoli inobatga olindi.
Jinoyatning xususiyati, ijtimoiy xavflilik darajasi va shaxsi e’tiborga olinib, insonparvarlik va odillik prinsiplariga amal qilindi va sudlanuvchiga tegishli jazo tayinlandi.
Izoh (0)