“Milan”ning “la’natlangan” to‘qqizligi. Kshishtof Pyontekka berilmagan raqam haqida

O‘zining shonli davrlarini qo‘msayotgan “Milan” qishki transferlar vaqtida ikki jiddiy kelishuvni amalga oshirdi. “Rossonerilar” yarim mavsum klubda ijarada bo‘lgan argentinalik hujumchi Gonsalo Iguainni muddatidan avval “Yuventus”ga ravona qildi. Oradan hech qancha vaqt o‘tmay, A Seriyada javlon urayotgan “Jenoa” to‘purari Kshishtof Pyontekni safiga qo‘shib olganini e’lon qildi.

“Milan” polshalik uchun 35 million yevroning bahridan o‘tib, u bilan 2023-yilning yoziga qadar shartnoma imzoladi. Yangi klubga kelgan Pyontek esa Iguaindan qolgan 9-raqamni olishni xohladi, ammo jamoa rahbariyati bunga rozi bo‘lmadi.

Pyontek 9-raqamda to‘p surishni xohladi, ammo biz uning erishgan yutug‘ini ko‘zda tutib, 19-raqamni unga berishga qaror qildik. Hozir 19 ta o‘yinda 13 ta gol urgan futbolchi haqida gapiryapmiz. Ushbu muhim transfer o‘zini oqlaydimi yoki yo‘q, bu borada bir to‘xtamga kelishimiz kerak edi. Kshishtof Italiya chempionati to‘p surishi uchun barcha kerakli xususiyatlarga ega. Klub qarorlari jamoaviy tarzda, shu jumladan, bosh murabbiy bilan birgalikda muhokama qilinadi.

Leonardo, “Milan” sport direktori

Ehtimol, Pyontekning o‘zi bundan biroz xafa bo‘lgandir. Balki hammasi yaxshilikka bo‘lgandir!? Nima uchun, deysizmi? Gap shundaki, “Milan”da 9-raqam ostida to‘p surgan afsonaviy Filippo Inzagi jamoani tark etgach, ushbu raqamga munosib nomzod chiqmadi. Inzagidan so‘ng klubda 9-raqam ostida 8 nafar  hujumchi harakat qildi, ammo “bevafo to‘qqiz” ularning hech biriga vafo qilmadi. Quyida “Milan”da “la’natlangan raqam” ostida to‘p surib, omadi kelmagan futbolchilar haqida so‘zlashamiz.

Aleshandre Pato

“Milan”da 2012/13-yilgi mavsumda 9-raqam ostida o‘ynagan.

Filippo Inzagi futboldagi faoliyatini tugatgandan so‘ng “to‘qqiz” braziliyalik Patoga meros bo‘lib qoldi. Biroq bu iste’dodli futbolchiga na baxt va na omad keltirdi. 2012/13-yilgi mavsum Aleshandre uchun faoliyatidagi eng omadsiz va muvaffaqiyatsiz davr sifatida yodda qoldi.

Mavsumning birinchi yarim yilligida Pato atigi 7 ta o‘yinda (barcha musobaqalarda ) maydonga tushdi va bor-yo‘g‘i 2 ta gol urdi, xolos. Patoning “Milan”da o‘tkazgan so‘nggi oylari hujumchi uchun haqiqiy surgun bo‘ldi — u jarohatlar girdobida qolib ketdi. “Milan” esa yanvardayoq Aleshandre bilan xayrlashib qo‘ya qoldi. Pato 15 million yevro evaziga “Korintians” klubiga o‘tdi va Italiya futboliga qaytib qadam bosmadi.

Alessandro Matri

2013/14-yilgi mavsumda “Milan” tarkibida 9-raqamda o‘ynadi.

Keyingi mavsum “rossonerilar” hujum chizig‘ini kuchaytirish maqsadida “Yuventus”dan Alessandro Matrini olib keldi. Matri esa 9-raqamli futbolkaning yangi egasiga aylandi. Italiyalik futbolchining o‘yin uslubi bir qarashda Filippo Indzagini eslatardi. U kelgan mavsumining birinchi davrasida A Seriyada 15 ta uchrashuvda maydonga tushib, atigi bitta golga mualliflik qildi.  Shundan so‘ng yanvar oyida “Fiorentina”ga ijaraga berib yuborildi. Orada bir yana klubga qaytarildi. Biroq hech narsa o‘xshamadi. Keyinchalik futbolchi karyerasi davomida “Jenoa”, “Yuventus”, “Latsio” klublarida to‘p surdi. 2016-yilning yoz oyida Matri erkin agent sifatida “Sassuolo” tarkibiga kelib qo‘shildi va hozir ham ushbu klub sharafini himoya qilmoqda.

Fernando Torres

2014/15-yilgi mavsumda “Milan”da 9-raqamda o‘ynagan yana bir futbolchi.

Ispaniyaning so‘nggi 20 yillikdagi eng yaxshi hujumchilaridan biri katta umidlar bilan “Milan”ga “Chelsi”dan ijaraga olib kelindi. Torres ham Pato va Matri singari 9-raqam ostida maydonga tushdi va klubda faqat 6 oygina o‘ynadi, xolos. Shu vaqt ichida Torres A Seriyada 10 ta uchrashuvda maydonga tushib, raqib darvozasiga bitta gol urdi. Milanlik muxlislarning hafsalasi esa Torresdan allaqachon pir bo‘lib ulgurgandi. Natijada yanvar oyining boshida “Milan” Torresni “Chelsi”dan 3 million yevro evaziga sotib oldi va oradan bir kun o‘tib, London klubi Madridning “Atletiko” jamoasi bilan o‘yinchi almashdi. Fernando Torres Madridga, Alessio Cherchi esa Londonga yo‘l oldi.

Mattia Destro

2014/15-yilgi mavsumda Destro ham “Milan” tarkibida 9-raqamda to‘p surdi.

Torres ketganidan uch hafta o‘tgach, “Milan” “Roma” bilan mavsum oxiriga qadar Mattia Destro ijarasi bo‘yicha kelishuvga erishdi. 2013/14-yilgi mavsumni yaxshi o‘tkazgan italiyalik futbolchi 9-raqamli libosni kiydi va barcha mas’uliyatni zimmasiga olib, “la’natlangan” raqam maqomini yengishga bor kuchi bilan harakat qildi.

Biroq “Milan” tarkibidagi yarim yillik urinishlari zoye ketdi. A Seriyada 15 ta o‘yinda 3 ta gol — hujumchi uchun deyarli natija emas. Bu esa “rossonerilar” rahbariyati yana bir qaror qabul qilishi kerakligini anglatardi. Klub “Roma”dan Mattiani to‘laligicha sotib olishni xohlamadi. 2015-yilning yozida futbolchi uchun “Bolonya” 8,5 million yevro taklif qildi. Rimliklar esa bajonidil rozi bo‘ldi. Shundan so‘ng Destro “qizil-ko‘klar” tarkibiga kelib qo‘shildi.

Luis Adriano

2015/16-yilgi mavsumda “Milan”da o‘ynadi va 9-raqamning navbatdagi egasiga aylandi.

2014/15-yilgi mavsumda Luis Adriano Chempionlar Ligasida “Shaxtyor” safida 9 ta gol urishga muvaffaq bo‘ldi. Natija “Milan” rahbariyatini diqqatini tortmay qolmadi va 2015-yilning yozida braziliyalik o‘yinchini 8 million yevroga sotib oldi. Dastlab Luis Adriano “Milan”da 9-raqam libosini kiydi. Ammo oradan bir yil o‘tib bu raqam omad keltirmasligini hisobga oldi va uni 7-raqamga almashtirdi.Yarim yil ichida Luis Adriano “Milan” tarkibida barcha musobaqalarda 36 ta uchrashuvda maydonga tushib, 6 ta gol urdi. Shubhasiz, bu “rossonerilar” uchun yetarli emas edi. Bundan tashqari Italiya nashrlaridan biri La Repubblica 2016-yil yakuniga ko‘ra, Luis Adrianoni mavsumdagi eng yomon transfer deb baholadi. 2017-yilning yanvar oyida “Milan” braziliyalik futbolchini erkin agent sifatida Moskvaning “Spartak” klubiga o‘tishiga rozi bo‘ldi. Buning ajablanarli joyi yo‘q edi, chunki Italiya klubi 6 ta gol urgan hujumchi uchun katta maosh to‘lashi aqlga sig‘adigan ish emasdi.

Janluka Lapadula

2016/17-yilgi mavsumda “Milan”da 9-raqamda o‘ynagan 6-futbolchi bo‘ldi.

2016-yilning yozida “Milan” klubi “Peskara”ning unchalik mashhur bo‘lmagan futbolchisi — Janluka Lapadulani o‘z tarkibiga qo‘shib olib, barchani birdek hayratga soldi. Uning 9-raqam ostida maydonga tushishi esa klub muxlislarini yanada ajablantirdi. Lapadula atigi bir yil “Milan” sharafini himoya qildi (A Seriyada 27 ta uchrashuvda 8 ta gol urdi). Shundan so‘ng u “Jenoa”ga ijaraga berib yuborildi. Keyinchalik esa genuyaliklar hujumchini 11 million yevro evaziga sotib oldi. Lapadula “Milan”ga kelib, deyarli hech narsa yo‘qotmadi. Birinchidan, klub rahbariyati undan ko‘p narsa talab qilmadi. Ammo baribir Janluka ham 9-raqamning haqiqiy egasiga aylana olmadi.

Andre Silva

2017/18-yilgi mavsumda “Milan”da 9-raqamli futbolkani kiygan yana bir futbochi.

O‘z vatanida “ikkinchi Krishtianu Ronaldu” deb ta’riflangan Andre Silvaga “Milan” rahbariyati ham muxlislari ham katta umid bog‘lagan edi. “Milan” 2017-yil yozida Silva uchun “Portu”ga 38 million yevro to‘lagani ham katta umiddan darak edi. Biroq...

Bir yil davomida Andre Silva A Seriyada “Milan” tarkibida 24 ta uchrashuvda maydonga tushib, 2 ta golga mualliflik qildi. Bu natija haqida hech narsa deyishga xojat yo‘qligini oddiy futbol muxlisi ham biladi. Shundan so‘ng, “Milan” rahbariyati mavsumni bo‘sh o‘tkazgan portugaliyalik futbolchini Ispaniyaning “Sevilya” klubi tomonidan tushgan taklifiga “labbay” deb javob berdi. U ayni damda Andalusiya klubida ijara asosida to‘p tepmoqda.

 Gonsalo Iguain

2018/19-yilgi mavsumda “Milan” tarkibida 9-raqamda maydonga tushgan hozircha eng so‘nggi o‘yinchi.

Iguainning transferi kutilmagan voqea bo‘lgandi. “Milan” Pipitoni “Yuventus”dan sotib olish sharti bilan bir mavsumga ijaraga oldi. Argentinalik hujumchi  mavsumni ajoyib o‘tkazishi va ko‘plab gollar bilan muxlislarni xursand qilishi kutilgandi. Ammo buning uddasidan chiqa olmadi va oradan yarim yil o‘tmay unga ham javob berildi. Hujumchi barcha musobaqalarda 22 ta uchrashuvda maydonga tushib, 8 ta golga mualliflik qildi. Iguainning o‘zida sobiq ustozi boshchilik qilayotgan “Chelsi”ga o‘tish varianti paydo bo‘lganda, uni na Milan, na “Yuventus” qaytara oldi. Iguain “Chelsi”da hozircha yomon boshlamadi. 2 ta o‘yinda 2 ta gol.

FootballHD’dan Azizbek Nahanov tarjimasi