Sudanning tezkor harakatlanuvchi harbiylashgan kuchlari (RSF) Shimoliy Kordofan shtatida uyushtirgan hujumlar oqibatida qariyb 300 kishi halok bo‘ldi. Bu haqda mahalliy faollarga tayanib The Guardian xabar berdi.
RSF 2023-yil aprel oyidan buyon Sudan armiyasiga qarshi jang qilmoqda. Hujumga uchragan hudud esa fuqarolar urushining asosiy frontlaridan biri hisoblanadi. 12-iyul kuni RSF Bara shahri atrofidagi bir nechta qishloqqa hujum qilgan.
Shag Alnom qishlog‘ida 200 dan ortiq odam o‘t qo‘yish yoki o‘qqa tutilish oqibatida halok bo‘lgan. Boshqa qishloqlarda amalga oshirilgan talonchilik reydlari davomida esa yana 38 nafar tinch aholi o‘ldirilgan, o‘nlab kishilar bedarak yo‘qolgan.
Jahon sog‘liqni saqlash tashkilotiga ko‘ra, Sudandagi shifoxonalardan biriga uyushtirilgan hujumda 40 dan ortiq tinch fuqaro halok bo‘lgan. 13-iyul kuni esa Hilat Hamid qishlog‘iga qilingan navbatdagi hujumda 46 kishi, jumladan, homilador ayollar va bolalar qurbon bo‘lgan. BMT ma’lumotlariga ko‘ra, bu hujumlar oqibatida 3400 dan ortiq odam o‘z uyini tark etishga majbur bo‘lgan.
Favqulodda huquqshunoslar (Emergency Lawyers) tashkilotining bildirishicha, hujumga uchragan qishloqlarda harbiy obyekt yo‘qligi aniqlangan.
Bu esa xalqaro gumanitar huquq normalarini butunlay mensimasdan, sodir etilgan jinoyatlarning qasddan uyushtirilganini ko‘rsatadi, deydi tashkilot.
Sudan armiyasi hozirda mamlakatning markaziy va sharqiy qismini qat’iy nazorat ostida ushlab turibdi. RSF esa g‘arbiy hududlar, xususan, Shimoliy Kordofan ustidan to‘liq nazorat o‘rnatishga harakat qilmoqda.
AQSH va bir qator inson huquqlari tashkilotlari RSFʼni urush jinoyatlari, insoniyatga qarshi jinoyatlar va genotsidda ayblab kelmoqda. RSF rahbariyati esa bunday harakatlarda aybdor deb topilganlarni javobgarlikka tortishga va’da bergan.
Sudandagi fuqarolar urushi dunyodagi eng yirik gumanitar inqirozlardan biriga aylangan. Aholining yarmidan ko‘pi ochlikka yuz tutgan, mamlakat bo‘ylab vabo kabi yuqumli kasalliklar keng tarqalgan. Xalqaro yordam mablag‘larining qisqarishi esa bu inqirozga javob berish imkoniyatlarini keskin cheklab qo‘ymoqda.
Izoh (0)