“Tottenhem”ni Liga Kubogidan chiqarib yuborgan “Chelsi” London klublari rekordini takrorladi

25-yanvar, juma kuni futbol bo‘yicha Angliya Liga Kubogining yarim finali doirasida “Chelsi” klubi “Tottenhem”ni ikki o‘yin natijasiga ko‘ra, mag‘lub etdi (2:2, penaltilar seriyasi: 4:2).

Natijada “ko‘klar” 8-marta musobaqaning finaliga chiqdi va London klublari orasidagi rekordni takrorladi, deb xabar beradi Opta.

Avvalroq bunday natijani “Arsenal” va “Tottenhem” klublari qayd etgandi. Ular ham 8 marta Liga Kubogi finalida o‘ynagan.

Endi 24-fevral kuni Mauritsio Sarri shogirdlari musobaqa g‘olibligi uchun “Manchester Siti” bilan kurash olib boradi. Uchrashuv “Uembli” stadionida bo‘lib o‘tadi.

Ma’lumot uchun, Liga Kubogining amaldagi g‘olibi Xosep Gvardiola jamoasi hisoblanadi.