Germaniya hukumati 2018-yilning yanvar oyidan noyabr oyiga qadar mamlakatdan har doimgidan ko‘proq boshpana izlovchilarni chiqarib yubordi. Bu haqda Süddeutsche Zeitung gazetasi xabar berdi.
Bu vaqt ichida Germaniya Yevropa Ittifoqining boshqa mamlakatlariga 8658 nafar muhojirni jo‘natgan. 2017-yilning xuddi shu davri mobaynida 7102 nafar muhojir boshqa mamlakatlarga jo‘natilgan edi.
Qaytarib yuborilgan muhojirlar bilan ularni avvalroq o‘z hududi orqali Yevropa Ittifoqi hududiga o‘tkazib yuborgan davlatlar shug‘ullanadi. Gazetaning qayd etishicha, o‘tgan yilda boshpana so‘raganlarning har uchtasidan bittasi ijobiy javob olgan.
Germaniya 2018-yilda Ittifoq mamlakatlariga muhojirlarni qabul qilishni so‘rab, jami 51 558 ta so‘rov jo‘natgan. Mamlakat hukumati 68,6 foiz holatda ijobiy javob olgan. Bu 2017-yilga nisbatan 9,4 foizga ko‘p hisoblanadi. Vengriya bir yil ichida Germaniyadan birorta ham muhojirni qabul qilmagan. Gretsiyaga esa jami besh nafar muhojir qaytgan. Italiya Germaniya tomonidan jo‘natilgan har uchinchi muhojirni qabul qilgan.
Izoh (0)