O‘tgan yilda Farg‘ona viloyati Toshloq tuman ma’muriy sudiga tuman ichki ishlar bo‘limi tomonidan diniy marosimlarni o‘tkazish qoidalarini buzish hamda diniy ta’limotdan saboq berish tartibini buzish bilan bog‘liq yigirmaga yaqin ma’muriy huquqbuzarlikka oid ishlar mazmunan ko‘rib chiqishlik uchun taqdim qilindi. Bu haqda O‘zA xabar bermoqda.
Xususan, sudga “Honaqa” mahalla fuqarolar yig‘inida yashovchi A. H ga nisbatan O‘zbekiston Respublikasi Ma’muriy javobgarlik to‘g‘risidagi kodeksining 201-moddasi 2-qismi bilan to‘plangan ma’muriy ish xujjatlari kelib tushib, sud majlisida muhokama qilindi. U hech qanday diniy ma’lumotga ega bo‘lmasada, diniy marosimlar o‘tkazish qoidalarini buzib, M. Maqsudovaning qonuniy turmush o‘rtog‘i A. Kamolovni boshqa bir ayolga sha’riy nikohlab qo‘yganligi aniqlandi. Sudning qarori bilan unga nisbatan eng kam oylik ish haqining 5 baravari miqdorida jarima jazosi tayinlandi.
“Qumariq” mahalla fuqarolar yig‘inida yashovchi O. N ham 2018 yil 21 mart kuni hech qanday diniy ma’lumotga ega bo‘lmasada, diniy marosimlar o‘tkazish qoidalarini buzib, o‘z o‘g‘lini boshqa bir ayolga sha’riy nikohlab qo‘ygan.
“Honaqa” mahalla fuqarolar yig‘inida yashovchi K. E ham Sh.E bilan qonuniy nikohi bo‘lishiga qaramasdan o‘zini M.O ga sha’riy nikohlab olgan. Sudning qarori bilan unga nisbatan eng kam oylik ish haqining 10 baravari miqdorida jarima jazosi tayinlandi.
Amaldagi tartiblarga binoan shar’iy nikoh o‘qish diniy ma’lumotga ega bo‘lgan vakolatli shaxslar tomonidan amalga oshiriladi va buning uchun fuqarolik holati dalolatnomalarini yozish bo‘limining ruxsati kerak bo‘ladi. O‘zbekiston Respublikasi Oila kodeksining 13-moddasiga muvofiq nikoh fuqarolik holati dalolatnomalarini qayd etish organlarida tuziladi. Diniy rasm-rusumlarga binoan tuzilgan nikoh huquqiy ahamiyatga ega emas. Tegishli idora ruxsatisiz shar’iy nikoh o‘qigan har qanday fuqaro, mavqeidan qat’iy nazar qonun oldida javobgardir.
Izoh (0)