O‘zbekistonning ayrim elektron OAVlarida chet el fuqarolari Lyudoviki Bartoli va Filip Erfyurtaning elektron vizalarni noto‘g‘ri rasmiylashtirilganligi sabab Toshkentdan uchib ketishda muammolar yuzaga kelganligi haqida ma’lumotlar tarqaldi. Bu haqda TIV matbuot xizmati xabar berdi.
TIV konsullik-huquqiy departamentining ma’lum qilishicha, yuqorida nomlari tilga olingan shaxslarning O‘zbekistonda bo‘lish muddatlari ular tomonidan qoldirilgan onlayn arizalar asosida rasmiylashtirilgan. 2018-yilning iyulidan “e-visa” elektron vizalarni rasmiylashtirish jarayoni elektron tizimga ariza beruvchi tomonidan qoldirilgan anketa ma’lumotlari asosida shakllantiriladi.
Tizim shunday tuzilganki, unga uchinchi shaxslar, xususan konsullik xodimlarining aralashuviga yo‘l qo‘yilmaydi. Ya’ni tizim faqat ariza qoldiruvchining kiritgan ma’lumotlarni, xususan O‘zbekistonda bo‘lish muddatini qabul qiladi.
On-layn ariza qoldirganidan uch kun o‘tgach L.Bartoli ijobiy javob olgan va javobda uning O‘zbekiston hududini tark etishi lozim bo‘lgan sana 4-yanvar 2019-yil ko‘rsatilgan. Xabarda viza muddatini uzaytirish istagi tug‘ilganda esa IIV xorijga chiqish va kirish bo‘limlariga murojaat qilish kerakligi (O‘zbekiston Respublikasi Qonunchiligiga muvofiq) ko‘rsatilgan. Bir kundan keyin uning turmush o‘rtog‘i F.Erfyurt ham (arizani bir kun keyin qoldirgan) O‘zbekistonni tark etish muddati 5-yanvar 2019-yil ko‘rsatilgan ijobiy javobni olgan.
Umumqabul qilingan me’yorlarga ko‘ra, har qanday mamlakatga tashrif buyurgan sayyoh ushbu mamlakatda bo‘lish muddatini mustaqil ravishda nazorat qilishi lozim. Viza rejimini buzganlik esa har qanday mamlakatda ma’muriy, hatto jinoiy oqibatlarni keltirib chiqaradi.
Asossiz ayblovlarga javoban konsullik-huquqiy departamenti Italiyaning Toshkentdagi elchixonasi bilan maslahatlashuv o‘tkazdi hamda yuqorida nomlari keltirilgan fuqarolar O‘zbekistonga sayyohlik maqsadida kelganini aniqladi. 30 million AQSh dollar hajmidagi investitsiya haqida hech qanday gap so‘z bo‘lmagan.
8-yanvar kuni Yunusobod tumani ma’muriy sudining majlisi bo‘lib o‘tadi, uning qaroridan so‘ng ushbu fuqarolar O‘zbekiston hududini tark etishi mumkin.
Shu bilan birga TIV OAV vakillaridan etikaga rioya qilishni hamda maqola chop etishdan oldin qonunchilikni va turli tomonlarning fikrlariga asoslanishni so‘raydi.
Izoh (0)