Mordoviya davlat universiteti professorlari Andijon davlat universiteti talabalari uchun vebinar tarzda onlayn ma’ruzalar o‘qidi. Bu haqda Oliy va o‘rta maxsus ta’lim vazirligi xabar bermoqda.
O‘tgan yili ilk marotaba Toshkent shahrida o‘tkazilgan O‘zbekiston-Rossiya ta’lim forumidagi kelishuvlar natijasiga ko‘ra Rossiya Federatsiyasining Mordoviya davlat universiteti va Andijon davlat universiteti o‘rtasida hamkorlik memorandumi imzolandi.
2019/2020-o‘quv yilidan boshlab universitetda Mordoviya davlat universiteti bilan qo‘shma dasturlar asosida talabalarni o‘qitish rejalashtirilgan. Mazkur memorandumda belgilangan vazifalarni amalga oshirish bo‘yicha alohida “Yo‘l xaritasi” ishlab chiqilgan. Yo‘l xaritasiga kiritilgan Mordoviya davlat universitetining professor-o‘qituvchilari tomonidan Andijon davlat universiteti talabalari uchun onlayn tarzida o‘quv mashg‘ulotlarini olib borish rejasi ishlab chiqildi.
Hamkorlik memorandumiga muvofiq Mordoviya davlat universiteti matematik analiz kafedrasi professorlari Ravilya Bekmurzina hamda Anna Klimovalar tomonidan universitetning matematika ta’lim yo‘nalishining 3-bosqich talabalari uchun vebinar onlayn ma’ruzalar olib borildi. Ushbu mashg‘ulotlar natijasida professor-o‘qituvchi va talabalar zamonaviy bilimlarni egalladi. 2019-yilda bunday ma’ruzalarning o‘tkazilishi reja bo‘yicha davom etadi.
Bugungi kunda Andijon davlat universiteti ta’lim sifatini oshirish maqsadida dunyoning nufuzli universitetlari bilan akademik, ilmiy va xalqaro hamkorlik yo‘lga qo‘yilmoqda. Jumladan, 52 ta oliy ta’lim muassasalari bilan hamkorlik aloqalari o‘rnatilgan bo‘lsa, bulardan 28 ta oliy ta’lim muassasalari bilan ikki tomonlama akademik memorandum va shartnomalar imzolandi.
2018-yilning o‘zida 50 dan ziyod rivojlangan davlatlarning oliy ta’lim muassasalari professor-o‘qituvchilari universitetda ayrim fanlardan ma’ruza mashg‘ulotlarini olib borgan bo‘lsalar, universitetning 20 dan ortiq professor o‘qituvchilari Amerika, Yevropa va Osiyo davlatlariga borib qisqa muddatli stajirovka, doktorantura va malaka oshirish kurslarida bo‘lib qaytdilar.
Izoh (0)