Қорақалпоғистоннинг Амударё тумани Манғит шаҳрида истиқомат қилувчи Алишер Йўлдошев эски «Запорожец» автомобилининг корпуси асосида янги автомобиль йиғди. Бу ҳақда ЎзА хабар берди.
Антиқа автомобилни яратишда Тикo’нинг мотори, Mazda’нинг ўриндиғи, Malibu’нинг рули ва орқа фаралари, Captiva’нинг олд қопламасидан фойдаланилган. Ихтирочи автомобилга «Ягона» деб ном берган.
Ёшлигимдан автомашина йиғишга қизиқаман ва анча вақт шуни ўзимга касб қилиб келганман. Шунинг орқасидан пул топиб, рўзғор тебратганман. 90 йилларда Нукус шаҳрида талабалик пайтимда уйларнинг олдида қантарилиб ётган автомобилларни кўриб, унинг эгалари билан гаплашиб сотиб олардим ва уларга қайта ишлов бериб сотардим.Ҳозиргача давлат ишларидан бўш пайтимда дарҳол автомашина йиғишга киришаман. Антиқа автомобиль яратиш ғояси бундан тўрт йил аввал пайдо бўлган. Бир куни автомобиль йиғаётганимда ёнимга қизчам (у вақтда 5-синфда эди) келиб, менга хушомад қилиб: ‘дада, менга ҳам машина олиб беринг. Фақат у машина ҳеч кимда йўқ, ягона бўлсин’ деди. Ғояни аслида қизим берган.
Натижада, мана кўриб турибсиз, ‘Ягона’ ‘марка’ли автомобиль дунёга келди. Худо хоҳласа, келгуси йилда қизим мактабни тугатади. Ушбу антиқа автомобилни қизимга совға қилмоқчиман.
‘Ягона’ автомобили уч йилда дунёга келди. Маблағ топган пайтда бозордан автомобилларнинг эҳтиёт қисмларини сотиб олганман. Мазкур автомобиль учун 50 миллион сўмдан кўпроқ харажат қилганман.
Алишер Йўлдошев, ихтирочи
Унинг ҳовлисида «Москвич—401» русумли эски автомобиль ҳам бор экан. Уни ҳам бир вақтлар харид қилган бўлиб, унга қайта ишлов берган. Айни пайтда автомобилнинг мотори яхши ҳолатда ишлаб турибди.
Алишер Йўлдошев келажакда шундай автомобиллардан музей ташкил қилишни ният қилган.
Изоҳ (0)