Multiplikatsiya yo‘nalishida eng katta muammo — kadrlarning yetishmovchiligi. Bu haqda “Multiplikatsion filmlar studiyasi” DUK direktori Obid Asomov Toshkent shahrida animatsiya bo‘yicha o‘tkazilgan amaliy mashg‘ulot vaqtida bergan intervyusida qayd etib o‘tdi, deb yozadi O‘zA.
“Rassomlar tegishli fakultetlarda o‘qib chiqyapti, lekin aynan multiplikatsiyaga bosh qo‘shadigan animatorlar hali yetmaydi. Oldimizdagi maqsad juda katta. Biz 2020-yilgacha 50 ta multfilm ishlab chiqarishimiz kerak. Buning uchun bizga nafaqat rasm chizishni, balki animatsiyani biladigan mutaxassislar kerak. Bizda shuncha film olish uchun sharoit bor, mablag‘ ham ajratilgan. Texnik tomondan ham yordam berilyapti. Biz Multiplikatsion filmlar studiyasi qoshida o‘quv markaz tashkil qildik. Hozir shu markazda 20 ga yaqin yoshlar ta’lim olyapti. Treningdan maqsad ham aynan yosh animatorlarni mahoratini oshirish va bu orqali chiqayotgan multfilmlarimizning sifatini ko‘tarishdan iborat. Bu seminarni tashkil etilishi bizning orzumiz edi. 5 kun davomida jahonga mashhur multiplikator Mixail Tumelya bizning yoshlarga saboq berdi”, — dedi Obid Asomov.
Albatta, bugungi kunda animatsion filmlarning bola tarbiyasidagi o‘rnini isbotlashga hojat yo‘q. Ekranlarni to‘ldirib turgan, dunyo bozorini egallagan Disney u yoqda tursin, hatto “Animakord” multfilmlari bilan raqobatlashish darajasiga yetish ancha qiyin. Mahoratli mutaxassislarni jalb etilgan holda treninglar o‘tkazish esa, xalqaro tajribani o‘rganish barobarida, animatorning shaxsiy qarashlari va g‘oyalarini bilish imkonini ham yaratdi.
Treningni katta qiziqish bilan kuzatib borgan yosh animator-rejissor Azizbek Muhammedovdan tadbirning foydalilik darajasi so‘ragalganida, u ancha samarador bo‘lganini qayd etib o‘tdi. Shu bilan bir qatorda yaqin yillarda multiplikatsiyaning rivojiga umid qilayotganini ham bildirib o‘tdi.
Izoh (0)