Toshkentning Sergeli tumanida standart vaksina olganidan keyin bir necha kun o‘tib, ikki oylik chaqaloq vafot etdi. Bolaning onasi o‘g‘lining o‘limiga shifokorlarning sovuqqonligi sababchi bo‘lganini aytmoqda, deb yozadi “Nuz.uz”.
Toshkent shahar prokuraturasi avgust oyida yuz bergan ushbu holat yuzasidan Jinoyat kodeksining 116-moddasi (Kasb yuzasidan o‘z vazifalarini lozim darajada bajarmaslik) 3-qismi bilan jinoyat ishi qo‘zg‘atdi.
Muassasa xabariga ko‘ra, nevropatolog shifokor ko‘rigidan o‘tgach, chaqaloqqa 24-avgust kuni poliomiyelit va pnevmokokk infeksiyasiga qarshi vaksina qilingan. O‘sha kuni kechqurun bolaning tana harorati ko‘tarilgan. 26-avgust kuni ertalab bola 3-son shahar bolalar klinik kasalxonasiga kelib tushgan. Chaqaloqda “o‘pka sindromi va bosh miya shishi xavfi”ni aniqlashgan. Zarur choralar ko‘rila boshlagan, ammo ertasi kuni bolaning ahvoli ancha yomonlashgach, o‘pkalarni sun’iy shamollatish apparatiga ulangan.
28-avgust kuni zarur tibbiy uskunalar yo‘qligi sababli, bola Respublika shoshilinch tibbiy yordam ilmiy markaziga o‘tkazilgan, bir kecha-kunduzdan keyin bola shu yerda jonlantirish bo‘limida vafot etgan.
Prokuratura xabarida aytilishicha, bola kasalxonaga og‘ir ahvolda kelib tushgan. Navbatchi shifokor uni zarur bo‘lgan har uch soatda emas, har olti soatda ko‘zdan kechirgan. Shuningdek, dastlabki ma’lumotlarga ko‘ra, ikki kun avval aniq klinik tashxis qo‘yilmagan, asosiy laboratoriya tahlillari uchun biomaterial olinmagan, davolash o‘z vaqtida to‘g‘rilanmagan.
Prokuratura organlari o‘tgan hafta boshlangan tekshiruv davomida ikki oylik chaqaloqning o‘limiga shifokorlarning aloqador yoki yo‘qligini aniqlaydi.
Izoh (0)