O‘zbekiston Prezidentining “Parrandachilikni yanada rivojlantirish bo‘yicha qo‘shimcha chora-tadbirlar to‘g‘risida”gi qarori e’lon qilindi. Hujjat matni O‘zA tomonidan keltirildi.
Hujjat bilan Tiklanish va taraqqiyot jamg‘armasi mablag‘lari hisobidan ekvivalenti 50 million AQSh dollari miqdorida “O‘zsanoatqurilishbank” ATBning ustav kapitalidagi davlat ulushi oshirilishi belgilandi. Ustav kapitaliga kiritilayotgan 50 million dollar ekvivalentidagi maqsadli mablag‘lar parrandachilikni rivojlantirish sohasidagi loyihalarni moliyalashtirish maqsadida boshqa tijorat banklariga ham kreditlar ajratish uchun yo‘naltiriladi.
“Parrandasanoat” uyushmasi huzurida barcha parranda xo‘jaliklariga xizmat ko‘rsatuvchi zamonaviy ilmiy-diagnostika laboratoriya markazi tashkil etiladi.
2021-yilgacha bosqichma-bosqich barcha hududlarda parranda yetishtirish, uni qayta ishlash va yakuniy tayyor mahsulot tayyorlab, iste’molchiga yetkazish jarayonini to‘liq qamrab olgan parrandachilik klasterlari tashkil etiladi.
Parrandachilik xo‘jaliklari tomonidan import qilinayotgan yem bo‘ladigan donni temir yo‘l orqali tashishda, istisno tariqasida, MDH temir yo‘llari tarif siyosatining 35 foizidan ko‘p bo‘lmagan miqdorda chegirma beriladi.
Iqtisodiyot vazirligi va “O‘zdonmahsulot” kompaniyasiga parrandachilik xo‘jaliklariga talab qilinadigan don mahsulotlarining har oyda birja savdolariga qo‘yib borilishini ta’minlash topshirildi.
2021-yil 1-noyabrga qadar muddatda:
Naslli ona tovuq va barcha turdagi texnologik asbob-uskunalar sotib olish, parranda yetishtirishni tashkil etish, parranda mahsulotlarini qayta ishlash va saqlash, inkubatsiya sexlarini tashkil etish, parrandachilikka ixtisoslashgan bino-inshootlarni qurish va qayta ta’mirlash, maxsus texnika, ehtiyot qismlar va boshqa asosiy vositalar;
Chet el tashkilotlari va uning shu’ba korxonalari, firma do‘konlari, dilerlik tarmoqlari va tadbirkorlik subyektlari tomonidan parrandachilik xo‘jaliklari ehtiyoji uchun chetdan keltiradigan parranda ozuqa va ozuqa qo‘shimchalari, veterinariya preparatlari, diagnostikumlar o‘rnatilgan tartibda shakllantiriladigan ro‘yxat bo‘yicha bojxona to‘lovlaridan (bojxona rasmiylashtiruvi yig‘imlaridan tashqari) ozod etiladi.
Izoh (0)