Бухоро вилояти давлат солиқ хизмати органлари ходимлари бевосита жойларга чиқиб, қўлбола иситиш мосламалари билан савдо қилиш ноқонуний эканлиги юзасидан тадбиркорлар ўртасида тушунтириш ишларини олиб бормоқда. Бу ҳақда вилоят солиқ бошқармаси матбуот хизмати «Дарё» га хабар берди.
«Қарор талабларидан келиб чиқиб, бозорлар ва савдо комплексларида ‘қўлбола’ усулда ясалган иситиш воситаларини сотиш ноқонуний эканлиги юзасидан бугунги кунга қадар 10 нафардан ортиқ тадбиркорга расман огоҳлантиришлар берилди ва уларнинг бундай воситаларни сотишдан воз кечишларига эришилмоқда. Огоҳлантиришдан кейин ҳам ушбу мосламаларни сотиш давом эттирилса, уларга нисбатан қонуний чоралар кўрилади, товар моддий бойликлар эса давлат фойдасига мусодара қилинади», — дейди вилоят ДСБ Жамоатчилик билан алоқалар ва ҳуқуқий ахборот шўъбаси масъул ходими А.Очилов.
Жумладан, Бухоро шаҳрида истиқомат қилувчи фуқаро Азим Амонов ҳеч қандай ҳужжатларсиз қўлбола ясалган ностандарт иситиш мосламаларини ишлаб чиқариб, шаҳар ҳудудидаги бозорда сотиш билан шуғулланиб келаётганлиги аниқланиб, белгиланган тартибда далолатнома расмийлаштирилди.
Натижада, ушбу «тадбиркор»нинг 7 хил турдаги 60 дона 3 миллион 400 минг сўмлик, худди шундай фаолият билан шуғулланиб келаётган ғиждувонлик «уддабурон»нинг эса фуқаро Саломат Нарзуллаева қўлбола ясалган газ пуфлагичларни сотаётганлиги аниқланиб, белгиланган тартибда савдодан олиб қўйилди.
Шунингдек, Олот туманидаги Олот туман Халифа маҳалла фуқаролар йиғини ҳудудида жойлашган устахонада фуқаро Хасан Рўзиев ҳеч қандай ҳужжатларсиз ноқонуний равишда темирдан газ иситгич мосламалари ҳамда қўл бола ясалган электр жиҳозларини ясаш билан шуғулланаётганлиги аниқланди. Натижада, қоидабузарга белгиланган тартибда чора кўрилди ҳамда унинг устахонасидан қўлбола ясалган иситиш анжомлари далилий ашё сифатида вақтинча сақлаш учун олинди.
Изоҳ (0)