Kimyo yo‘nalishi bo‘yicha Nobel mukofoti laureati, AQShning Shimoliy Karolina universiteti professori Aziz Sanjar O‘zbekistonda bo‘lib, mamlakatda amalga oshirilayotgan ijtimoiy-iqtisodiy yangilanishlar bilan tanishdi, tarixiy shahar va obidalarni ziyorat qildi. Bu haqda “Xalq so‘zi” xabar bermoqda.
Mirzo Ulug‘bek nomidagi O‘zbekiston Milliy universitetida o‘tkazilgan uchrashuvda taniqli olim mazkur safar davomida olgan taassurotlari, ilm-fanning hayotidagi o‘rni, O‘zbekiston ta’lim tizimida amalga oshirilayotgan islohotlar haqida fikr-mulohazalarini bildirdi.
— Ilm-fanga qiziqish bolaligimda uyg‘ongan. Ota-onam yaxshi ta’lim olishimizga alohida e’tibor qaratardi. Istanbul universitetining tibbiyot fakultetini muvaffaqiyatli tamomlagach, o‘zim tug‘ilib o‘sgan qishloqqa borib, ikki yil shifokorlik qildim. Shundan so‘ng davlat granti bilan AQShga o‘qishga ketdim, Jon Xopkins universitetida tahsil oldim. Kimyoga bo‘lgan qiziqishim esa meni Texas universitetiga, fotoliaz jarayonini kashf etgan mashhur olim Klod Rupert laboratoriyasiga yetaklab bordi. Kuniga yigirma soat ishlab, to‘rt soat dam olardim, butun aql-u hushim qarshimda namoyon bo‘lgan ilmiy muammolar yechimini topishga yo‘nalgan edi. Shundan so‘ng DNK halqalarining o‘z-o‘zini tiklash qobiliyatiga aloqador tadqiqotlarga sho‘ng‘ib ketdim. Ushbu tadqiqot saraton kasalligini davolashda yangi bir tizimni ochib bergani bilan ahamiyatlidir.
Ilm-fan va ma’rifat markazi bo‘lmish O‘zbekistonga kelish uzoq yillik orzuim edi. Bu yerlar bizning ota yurtimiz, ajdodlarimiz Turkiyaga shu hududlardan ko‘chib borishgan ekan. Shu sababdan ham bu yurt men uchun juda qadrli.
O‘zbekiston go‘zal tabiati, shaharlarining orastaligi, odamlarining ochiq yuzli, mehmondo‘st ekani, tarixiy obidalarga boyligi bilan o‘ziga maftun qildi. Bu yerga men hech qanday moddiy manfaatlarsiz, sog‘inch bilan keldim. Yoshlarni ilm-fanga rag‘batlantirish ota Vatan oldidagi qarzimiz.
Prezident Shavkat Mirziyoyev rahnamoligida yurtingizda ilm-fanga jiddiy e’tibor qaratilayotganiga, zamonaviy ta’lim tizimi yo‘lga qo‘yilganiga guvoh bo‘ldim. Universitetlardagi talabalarning, yosh olimlarning bilimga chanqoqligi, intilishini ko‘rib juda sevindim. Yoshlarga zamonaviy fanlarni o‘zlashtirish uchun keng imkoniyatlar yaratilgan, ularda xorijiy tillarni o‘rganishga qiziqish kuchli ekan. Bu yaqin kelajakda albatta o‘z mevasini beradi.
Mamlakatingizda menga ko‘rsatilgan samimiy hurmat uchun g‘oyat minnatdorman. O‘zbekiston Milliy universiteti faxriy doktori unvonining berilishi, yangi ochilgan Tarmoqlararo molekulyar biologiya laboratoriyasiga nomim berilgani men uchun katta sharafdir.
Amerikaga o‘zim bilan O‘zbekiston bayrog‘ini olib ketaman. Men o‘zbek yoshlarini turkiy davlatlar yoshlari uchun qurgan markazimizda, Amerikada kutaman. Men turk dunyosi yoshlari Nobel mukofotlarini shu Vatan tuprog‘ida turib olishlarini xohlayman.
Bilim olish yoki tadqiqotlar uchun xorijga borsangiz ham, oxir-oqibat albatta o‘z Vataningizga qayting, olgan bilimlaringizni yurtingiz ravnaqi uchun sarflang. Muvaffaqiyat Nobel mukofotini olish emas, balki Vataningizga, xalqingizga va insoniyatga xizmatda bo‘lishdir. Xoh oddiy bir kasb egasi, xoh Nobel laureati bo‘ling — o‘z vazifangizni mukammal bajarsangiz, xalqingiz sizdan rozi bo‘lsa, chinakam mukofot shudir!
Izoh (0)