Кимё йўналиши бўйича Нобель мукофоти лауреати, АҚШнинг Шимолий Каролина университети профессори Азиз Санжар Ўзбекистонда бўлиб, мамлакатда амалга оширилаётган ижтимоий-иқтисодий янгиланишлар билан танишди, тарихий шаҳар ва обидаларни зиёрат қилди. Бу ҳақда «Халқ сўзи» хабар бермоқда.
Мирзо Улуғбек номидаги Ўзбекистон Миллий университетида ўтказилган учрашувда таниқли олим мазкур сафар давомида олган таассуротлари, илм-фаннинг ҳаётидаги ўрни, Ўзбекистон таълим тизимида амалга оширилаётган ислоҳотлар ҳақида фикр-мулоҳазаларини билдирди.
— Илм-фанга қизиқиш болалигимда уйғонган. Ота-онам яхши таълим олишимизга алоҳида эътибор қаратарди. Истанбул университетининг тиббиёт факультетини муваффақиятли тамомлагач, ўзим туғилиб ўсган қишлоққа бориб, икки йил шифокорлик қилдим. Шундан сўнг давлат гранти билан АҚШга ўқишга кетдим, Жон Хопкинс университетида таҳсил олдим. Кимёга бўлган қизиқишим эса мени Техас университетига, фотолиаз жараёнини кашф этган машҳур олим Клод Руперт лабораториясига етаклаб борди. Кунига йигирма соат ишлаб, тўрт соат дам олардим, бутун ақл-у ҳушим қаршимда намоён бўлган илмий муаммолар ечимини топишга йўналган эди. Шундан сўнг ДНК ҳалқаларининг ўз-ўзини тиклаш қобилиятига алоқадор тадқиқотларга шўнғиб кетдим. Ушбу тадқиқот саратон касаллигини даволашда янги бир тизимни очиб бергани билан аҳамиятлидир.
Илм-фан ва маърифат маркази бўлмиш Ўзбекистонга келиш узоқ йиллик орзуим эди. Бу ерлар бизнинг ота юртимиз, аждодларимиз Туркияга шу ҳудудлардан кўчиб боришган экан. Шу сабабдан ҳам бу юрт мен учун жуда қадрли.
Ўзбекистон гўзал табиати, шаҳарларининг орасталиги, одамларининг очиқ юзли, меҳмондўст экани, тарихий обидаларга бойлиги билан ўзига мафтун қилди. Бу ерга мен ҳеч қандай моддий манфаатларсиз, соғинч билан келдим. Ёшларни илм-фанга рағбатлантириш ота Ватан олдидаги қарзимиз.
Президент Шавкат Мирзиёев раҳнамолигида юртингизда илм-фанга жиддий эътибор қаратилаётганига, замонавий таълим тизими йўлга қўйилганига гувоҳ бўлдим. Университетлардаги талабаларнинг, ёш олимларнинг билимга чанқоқлиги, интилишини кўриб жуда севиндим. Ёшларга замонавий фанларни ўзлаштириш учун кенг имкониятлар яратилган, уларда хорижий тилларни ўрганишга қизиқиш кучли экан. Бу яқин келажакда албатта ўз мевасини беради.
Мамлакатингизда менга кўрсатилган самимий ҳурмат учун ғоят миннатдорман. Ўзбекистон Миллий университети фахрий доктори унвонининг берилиши, янги очилган Тармоқлараро молекуляр биология лабораториясига номим берилгани мен учун катта шарафдир.
Америкага ўзим билан Ўзбекистон байроғини олиб кетаман. Мен ўзбек ёшларини туркий давлатлар ёшлари учун қурган марказимизда, Америкада кутаман. Мен турк дунёси ёшлари Нобель мукофотларини шу Ватан тупроғида туриб олишларини хоҳлайман.
Билим олиш ёки тадқиқотлар учун хорижга борсангиз ҳам, охир-оқибат албатта ўз Ватанингизга қайтинг, олган билимларингизни юртингиз равнақи учун сарфланг. Муваффақият Нобель мукофотини олиш эмас, балки Ватанингизга, халқингизга ва инсониятга хизматда бўлишдир. Хоҳ оддий бир касб эгаси, хоҳ Нобель лауреати бўлинг — ўз вазифангизни мукаммал бажарсангиз, халқингиз сиздан рози бўлса, чинакам мукофот шудир!
Изоҳ (0)