O‘zbekiston Respublikasi Oliy Majlisi Qonunchilik palatasi deputatlari Sahobiddin Arziqulov va Murodulla Tursunovlar O‘zbekistonning investitsiyaviy jozibadorligi yanada oshirish mavzusidagi maqolani “Daryo”ga taqdim etdi. Quyida maqola e’tiboringizga havola etiladi.
30-oktabr kuni O‘zbekiston Prezidenti Shavkat Mirziyoyev raisligida joriy yilda Davlat budjetining kutilayotgan ijrosi, 2019-yilga mo‘ljallangan makroiqtisodiy ko‘rsatkichlar, budjet-soliq siyosatining asosiy yo‘nalishlari muhokamasiga bag‘ishlangan yig‘ilish bo‘lib o‘tdi.
Ta’kidlash joizki, 2017—2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi doirasida 2018-yilning o‘tgan davrida maqsadli iqtisodiy tadbirlar amalga oshirildi. Xususan, tadbirkorlik subyektlariga qulay biznes sharoitini yaratish maqsadida ularning moliya-xo‘jalik faoliyatiga bog‘liq bo‘lmagan rejali tekshirishlarga barham berildi. Shuningdek, tadbirkorlarga faoliyati bo‘yicha tegishli litsenziya va ruxsat berish tartibi o‘zgartirilib, litsenziya berish muddati qisqartirildi. Ichki bozorni sifatli iste’mol tovarlari bilan ta’minlash maqsadida bojxona-tarif boshqaruv tizimi takomillashtirilib, 6200 turdagi tovarlar bo‘yicha import bojiga nol stavka o‘rnatildi va 8 mingdan ortiq turdagi tovarlar bo‘yicha bojxona bojlari va aksizlar 2 martagacha kamaytirildi.
Shuni alohida ta’kidlash kerakki, 2018-yilda respublikaning xalqaro suveren reytingini olish va mamlakatning investitsiyaviy jozibadorligini oshirish maqsadida Standart and Poor’s, Moody’s, JP Morgan and Chase kabi bir qator xalqaro moliyaviy institutlar va reyting agentliklari bilan hamkorlikni mustahkamlash bo‘yicha tizimli ishlar boshlandi.
Hududlarda mahalliy budjet daromadlar bazasini kengaytirish, qo‘shimcha daromad manbalarini aniqlash va topish bo‘yicha olib borilgan ishlar natijasida 2018-yil yakuni bo‘yicha mahalliy budjetlar ixtiyorida 5,5 trillion so‘m yoki o‘tgan yildagiga nisbatan 6 barobar ko‘p mablag‘ qolishi kutilmoqda. Albatta, ushbu mablag‘lar hududlarni ijtimoiy-iqtisodiy rivojlantirish, obodonlashtirish, kam ta’minlangan aholini qo‘llab-quvvatlash, ta’lim va sog‘liqni saqlash sohalarining moddiy-texnika bazasini mustahkamlash borasida hokimliklarning imkoniyatini sezilarli darajada kengaytiradi.
Respublikamizda tadbirkorlikni qo‘llab-quvvatlash maqsadida yaratilgan 20 ta erkin iqtisodiy zonada umumiy qiymati salkam 1,7 milliard AQSh dollari bo‘lgan 281 ta investitsiyaviy loyiha amalga oshirilmoqda. Ushbu loyihalarning ishga tushishi bilan 2018-yilda 25 mingdan ziyod yangi ish o‘rinlari yaratilishi kutilyapti.
Shuningdek, 2019-yilda budjet daromadlarning izchil oshishi, soliq tizimida joriy etiladigan tarixiy o‘zgarishlar natijasida aholi hamda tadbirkorlik sohasiga katta yengilliklar yaratilishi rejalashtirilgan. Jumladan, yuridik shaxslar mol-mulk solig‘i 5 foizdan 2 foizgacha, foyda solig‘i 14 foizdan 12 foizgacha, kichik biznes subyetlari yagona solig‘i 5 foizdan 4 foizgacha kamaytirilishi natijasida tadbirkorlar ixtiyorida 2 trillion so‘m mablag‘ qoladi. Jismoniy shaxslar uchun daromad solig‘ining eng yuqori stavkasi 22 foizdan 12 foizgacha, yagona ijtimoiy to‘lovi 25 foizdan 15 foizgcha tushirilishi, fuqarolarning 8 foizlik sug‘urta badali bekor qilinishi natijasida aholi daromadlari umumiy hisobda 6,5 foiz oshadi. Tushumdan olinadigan majburiy ajratmalar bekor qilish natijasida esa korxonalar hisobida qo‘shimcha 5,2 trillion so‘m daromad qoladi.
Xulosa qilib aytganda, joriy yil budjeti va kelgusi yilga mo‘ljallangan moliyaviy hujjat tadbirkorlik subyektlari, eng muhimi, xalqimiz manfaatlaridan kelib chiqib tayyorlangani yurtimizda biznes muhitini yanada yaxshilash, investitsiya jozibadorligini oshirishga xizmat qiladi.
Izoh (0)