Toshkentdagi Milliy matbuot markazida o‘tkazilgan tadbirda O‘zbekistonda notariat sohasini isloh qilish borasida amalga oshirilayotgan chora-tadbirlar haqida batafsil ma’lumotlar berildi, deya xabar bermoqda “Xalq so‘zi Online”.
Tadbirda aholiga taqdim etilayotgan notarial xizmatlarning sifat va tezkorlik darajasi pastligi, notarial idoralardagi uzundan-uzun navbatlar, davlat boji va boshqa yig‘imlarni undirishda shaffoflik yo‘qligi, mavjud byurokratik to‘siq va g‘ovlar aholining notariat tizimiga bo‘lgan ishonchini susaytirib, korrupsiya ildiz otishi uchun imkoniyat tug‘dirishi ta’kidlangan.
“O‘zbekiston Prezidentining tegishli qarori asosida tatbiq etilayotgan yangi tizim muammolarga yechim topib, ko‘zda tutilayotgan innovatsion loyihalar esa bu yo‘nalishdagi ishlarni butunlay yangi bosqichga olib chiqmoqda”, — deyiladi xabarda.
Qayd etilishicha, 2019-yilning 1-yanvaridan boshlab davlat soliq xizmati organlari ro‘yxatiga ijara shartnomalarini majburiy kiritish tartibini o‘rnatish orqali ijara va ko‘chmas mulkdan bepul foydalanish shartnomalarini majburiy notarial tasdiqlash talablari bekor qilinadi.
Sudlarda ko‘pincha imzolarning haqiqiyligi ustida bahslashish hollari uchraganini hisobga olgan holda, notarial harakatlarni amalga oshirish jarayonida ariza beruvchi tomonidan notarial tasdiqlangan hujjatlarga imzo chekish va ularning qo‘l barmoqlari izini skaner qilish hamda vasiyatnoma va boshqa hujjatlarga imzo chekish jarayonini majburiy ravishda audio va video yozib borish orqali tasdiqlash tartibi joriy etilmoqda.
“Yana bir yangilik. Chekka hududlardagi aholining huquqiy xizmatlarga bo‘lgan talabini e’tiborga olgan holda, notariuslarni rotatsiya qilish amaliyotga joriy etilayotir”, — deb yozadi “Xalq so‘zi Online”.
Izoh (0)