Тошкентдаги Миллий матбуот марказида ўтказилган тадбирда Ўзбекистонда нотариат соҳасини ислоҳ қилиш борасида амалга оширилаётган чора-тадбирлар ҳақида батафсил маълумотлар берилди, дея хабар бермоқда «Халқ сўзи Online».
Тадбирда аҳолига тақдим этилаётган нотариал хизматларнинг сифат ва тезкорлик даражаси пастлиги, нотариал идоралардаги узундан-узун навбатлар, давлат божи ва бошқа йиғимларни ундиришда шаффофлик йўқлиги, мавжуд бюрократик тўсиқ ва ғовлар аҳолининг нотариат тизимига бўлган ишончини сусайтириб, коррупция илдиз отиши учун имконият туғдириши таъкидланган.
«Ўзбекистон Президентининг тегишли қарори асосида татбиқ этилаётган янги тизим муаммоларга ечим топиб, кўзда тутилаётган инновацион лойиҳалар эса бу йўналишдаги ишларни бутунлай янги босқичга олиб чиқмоқда», — дейилади хабарда.
Қайд этилишича, 2019 йилнинг 1 январидан бошлаб давлат солиқ хизмати органлари рўйхатига ижара шартномаларини мажбурий киритиш тартибини ўрнатиш орқали ижара ва кўчмас мулкдан бепул фойдаланиш шартномаларини мажбурий нотариал тасдиқлаш талаблари бекор қилинади.
Судларда кўпинча имзоларнинг ҳақиқийлиги устида баҳслашиш ҳоллари учраганини ҳисобга олган ҳолда, нотариал ҳаракатларни амалга ошириш жараёнида ариза берувчи томонидан нотариал тасдиқланган ҳужжатларга имзо чекиш ва уларнинг қўл бармоқлари изини сканер қилиш ҳамда васиятнома ва бошқа ҳужжатларга имзо чекиш жараёнини мажбурий равишда аудио ва видео ёзиб бориш орқали тасдиқлаш тартиби жорий этилмоқда.
«Яна бир янгилик. Чекка ҳудудлардаги аҳолининг ҳуқуқий хизматларга бўлган талабини эътиборга олган ҳолда, нотариусларни ротация қилиш амалиётга жорий этилаётир», — деб ёзади «Халқ сўзи Online».
Изоҳ (0)