Samarqand qishloq xo‘jaligi instituti negizida Samarqand Veterinariya meditsina instituti tashkil etildi. Bugun, 14-sentabr kuni mazkur institutning tantanali ochilish marosimi bo‘lib o‘tdi. Bu haqida “Daryo” muxbiri Farhod Norbo‘tayev xabar bermoqda.
Tantanali ochilish marosimida dastlab O‘zbekiston Respublikasi Davlat veterinariya qo‘mitasi raisi Bahrom Norqobilov, Samarqand viloyat hokimi o‘rinbosari Rustam Qobilov hamda institutning faxriy professorlari ramziy lentani kesdi.
Shundan so‘ng mehmonlarga institut faoliyati yaqindan tanishtirilib, bu yerda dars berish metodikasi, yaratilgan shart-sharoitlar, malakali kadrlar tayyorlash to‘g‘risida ma’lumot berib o‘tildi.
“Joriy yilgi o‘quv mavsumida institutning bakalavr bosqichiga 900 nafarga yaqin talaba qabul qilindi. Magistratura bosqichiga esa 50 nafar O‘zbekiston fuqarosini qabul qilish to‘liq davlat granti asosida amalga oshirildi, — deydi institut rektori Xudoynazar Yunusov. — Hozirgi kunda institutning 6 ta fakulteti, 23 ta kafedrasida 21 ta ta’lim yo‘nalishi bo‘yicha bakalavrlar, 13 ta mutaxassislik bo‘yicha magistrlar tayyorlanmoqda”.
Institutda rivojlangan xorijiy davlatlarning veterinariya va chorvachilik sohasi bo‘yicha ilg‘or tajribasini o‘rganish asosida davlat ta’lim standartlari, malaka talablari, o‘quv reja va fan dasturlari ishlab chiqilgan. Ayni paytda institutda 456 nafar professor-o‘qituvchi faoliyat yuritmoqda.
Izoh (0)