Самарқанд қишлоқ хўжалиги институти негизида Самарқанд Ветеринария медицина институти ташкил этилди. Бугун, 14 сентябрь куни мазкур институтнинг тантанали очилиш маросими бўлиб ўтди. Бу ҳақида «Дарё» мухбири Фарҳод Норбўтаев хабар бермоқда.
Тантанали очилиш маросимида дастлаб Ўзбекистон Республикаси Давлат ветеринария қўмитаси раиси Баҳром Норқобилов, Самарқанд вилоят ҳокими ўринбосари Рустам Қобилов ҳамда институтнинг фахрий профессорлари рамзий лентани кесди.
Шундан сўнг меҳмонларга институт фаолияти яқиндан таништирилиб, бу ерда дарс бериш методикаси, яратилган шарт-шароитлар, малакали кадрлар тайёрлаш тўғрисида маълумот бериб ўтилди.
«Жорий йилги ўқув мавсумида институтнинг бакалавр босқичига 900 нафарга яқин талаба қабул қилинди. Magisтратура босқичига эса 50 нафар Ўзбекистон фуқаросини қабул қилиш тўлиқ давлат гранти асосида амалга оширилди, — дейди институт ректори Худойназар Юнусов. — Ҳозирги кунда институтнинг 6 та факультети, 23 та кафедрасида 21 та таълим йўналиши бўйича бакалаврлар, 13 та мутахассислик бўйича магистрлар тайёрланмоқда».
Институтда ривожланган хорижий давлатларнинг ветеринария ва чорвачилик соҳаси бўйича илғор тажрибасини ўрганиш асосида давлат таълим стандартлари, малака талаблари, ўқув режа ва фан дастурлари ишлаб чиқилган. Айни пайтда институтда 456 нафар профессор-ўқитувчи фаолият юритмоқда.
Изоҳ (0)