Alisher Sultonov “O‘zbekneftgaz” boshqaruvi raisi lavozimini tark etdi

“O‘zbekneftgaz” AJ boshqaruvi raisi Alisher Sultonov lavozimini tark etdi. Bu haqda kompaniyadagi manbalarga tayanib, “Kun.uz” ma’lum qildi.

1999-yildan “O‘zbekneftgaz” tizimida ishlay boshlagan Alisher Sultonov 2015-yil avgustida kompaniya raisiga aylangandi.

Sultonov o‘rniga Bahrom Ashrafxonov “O‘zbekneftgaz” AJ boshqaruvi raisi lavozimini egallagani bildirilmoqda.

Ashrafxonov 2016-yil fevralidan buyon O‘zbekistonning Rossiyadagi elchisi sifatida faoliyat ko‘rsatib kelayotgandi.

U 1969-yilda Toshkent shahrida tug‘ilgan. 1993-yili Toshkent davlat iqtisodiyot universitetini tamomlagan. Moliya vazirligida turli lavozimlarda ishlagan, jumladan, 2005—2007-yillarda Moliya vazirining birinchi o‘rinbosari bo‘lgan. 2007-yildan 2016-yilgacha Moliya vazirligi G‘aznachiligi boshlig‘i lavozimida faoliyat ko‘rsatgan.

Alisher Sultonov O‘zbekiston Respublikasi bosh vazirining o‘rinbosari ham hisoblanadi. Ayni vaqtda u mazkur lavozimni saqlab qolgani aytilmoqda.

Eslatib o‘tamiz, Alisher Sultonov shu yilning 20-avgustida avtofalokatga uchrab, shifoxonaga yotqizilgandi.