O‘zbekiston meva va sabzavotlari Malayziyaga eksport qilinadi
Kichik biznes va xususiy tadbirkorlik subyektlari eksportini qo‘llab-quvvatlash jamg‘armasi tashabbusi bilan O‘zbekistonning Malayziyadagi elchixonasi bilan hamkorlikda yana bir loyihaga qo‘l urildi. Bu haqda jamg‘arma axborot xizmati “Daryo”ga xabar berdi.
Unga ko‘ra, O‘zbekistonda ishlab chiqarilayotgan mahalliy meva-sabzovot mahsulotlarining Malayziyaga eksportini yo‘lga qo‘yish, hamkorlikda qo‘shma korxona tashkil etish orqali zamonaviy talab va xalqaro standartlarga javob beradigan mahsulotlar tayyorlash maqsadida Baraka Istithmar kompaniyasi direktori Abdulloh Yusuf va o‘zbek tadbirkorlari o‘rtasida qator uchrashuvlar tashkil etildi.
Yuqori martabali mehmon O‘zbekistonda meva va sabzavotlarni yetishtirish ularni saqlash tizimidagi o‘zgarishlar, tayyorlanayotgan meva-sabzavotlarning sifati, xususan, ularning tabiiyligi hamda biokimyoviy xususiyatlarini alohida e’tirof etdi.
Shuningdek, eksport qilishda mahalliy ishlab chiqaruvchilarga ko‘maklashadigan tashqi savdo tashkilotlariga ham yaratilgan sharoitlarga alohida to‘xtalib o‘tdi. Bu borada Kichik biznes va xususiy tadbirkorlik subyektlari eksportini qo‘llab-quvvatlash jamg‘armasi faoliyati muhim o‘rin tutishini ta’kidladi. Mazkur uchrashuvni tashkil qilishda jamg‘armaning ko‘magi uchun minnatdorchilik bildirdi.
O‘z navbatida mahalliy ishlab chiqaruvchilar bilan o‘zaro savdo va sheriklik aloqalarini mustahkamlash, xususan meva-sabzovot vositalarini Malayziyaga eksport qilishning tashkiliy asoslari atroflicha muhokama qilindi. Tadbirkorlar ushbu jarayon bilan bog‘liq bo‘lgan o‘zlarini qiziqtirgan savollarga atroflicha javob olishdi.
Shu bilan birga, malayziyalik mehmon Xorazm viloyatiga ham taklif etildi. Uning tashrifi munosabati bilan, qadimiy va betakror Xiva shahrining tarixiy qismi – “Ichan qal’a”da mahalliy ishlab chiqaruvchilar mahsulotlarining ko‘rgazmasi tashkil etildi. Ko‘rgazmada Xorazm viloyatining meva-sabzovot ishlab chiqarish salohiyati to‘la namoyish qilindi. Yuqori martabali mehmon xorazmlik dehqonlar va tadbirkorlar bilan suhbatlashib, o‘zaro tajriba almashish va mahsulotlar eksportini yo‘lga qo‘yish borasida fikr almashish imkoniyatiga ham ega bo‘ldi.
Ushbu masalalar viloyat hokimi Farhod Ermanov bilan tashkil etilgan uchrashuvda ham atroflicha muhokama qilindi. Uchrashuvda shuningdek, O‘zbekiston Respublikasi Qishloq xo‘jaligi vaziri Bahodir Yusupov ham ishtirok etdi.
Tomonlar mahalliy mahsulotlar eksporti va uning tashkiliy-huquqiy tomonlari bo‘yicha fikr almashdi. Shuningdek, uchrashuvda viloyat dehqonlari tomonidan yetishtirilayotgan meva-sabzavot mahsulotlarini shu yerning o‘zida qayta ishlashga ixtisoslashgan qo‘shma korxona tashkil etish uchun investitsiya jalb qilish masalasi ham muhokama qilindi. Bu viloyaga xorijiy investitsiyalarni jalb etish, yangi ish o‘rinlari yaratish, tadbirkorlarni qo‘llab-quvvatlash, eksport hajmini oshirish orqali mahalliy byudjetga valyuta tushumi hajmini oshirishga xizmat qiladi.
