AQShning Texas shtatida yashovchi 26 yoshli Devis Kasares 2017-yilning sentabr oyida o‘z startapini ishga tushirishni orzu qilib, Ostindan Kremniy vodiysiga ko‘chib o‘tgan. Kasares kollejni tugatgan va General Motors’ga ishga joylashgan, u yerda sifat nazorati mutaxassisi lavozimidan veb-dasturchi lavozimigacha bo‘lgan yo‘lni bosib o‘tgan. Ko‘chib o‘tish uchun u bir nechta maoshiga teng summani yig‘gan, deb yozmoqda Meduza.
Kasares Kremniy vodiysida turar joyi xarajatlari va ish o‘rni uchun yuqori raqobatni hisobga olmagan. Shuning uchun qisqa vaqt ichida unda kvartira ijarasi uchun pul tugab qolgan.
Bir yildan ko‘proq vaqt davomida dasturchi o‘z furgonida yashagan, biroq keyinchalik to‘lanmagan bank krediti uchun furgon olib qo‘yilgan. Shunda Kasares xiyobonlarda tunni o‘tkazishni boshlagan. 2018-yilning iyun oyida dasturchining so‘nggi pullari ham tugagan, iyul oyida esa u ko‘chaga “Men uysizman. Muvaffaqiyatga tashnaman”, deb yozilgan panno bilan chiqqan. Dasturchi o‘tkinchilardan pul so‘ramagan — u o‘zining rezyumesini tarqatgan.
Twitter’dagi @jaysc0 taxallusli foydalanuvchi 27-iyulda Kasaresni ko‘rib qolgan va dasturchini suratga olib, o‘zining akkauntiga joylashtirgan va unga yordam berishga chaqirgan. Foydalanuvchining so‘zlariga ko‘ra, uning o‘zi Kremniy vodiysida o‘rnini topish uchun uch yil uringan va yaqinda bunga erishgan, shuning uchun u Kasaresga yordam berishga qaror qilgan.
Texnologik kompaniyalar va biznes treninglar o‘tkazuvchi maktablar foydalanuvchining xabariga tezda e’tibor qaratgan. Kasaresga allaqchon vaqtinchalik turar joy taklif qilingan. Bundan tashqari, dasturchi suhbat uchun 200 dan ortiq taklif olgan, shu jumladan, Google, Netflix, LinkedIn va Pandora kompaniyalaridan.
Izoh (0)