Xitoyda dafn marosimlarini taqiqlash va tobutlarni yo‘q qilish boshlandi

Xitoy janubi-sharqidagi Szyansi provinsiyasi rasmiylari yer resurslarini saqlab qolish maqsadida “faqat krematsiya” siyosatini joriy etish bo‘yicha choralar ko‘ra boshladi. Bu haqda South China Morning Post gazetasi xabar qildi, deb yozadi “TengriNews.kz”.

Rasmiylar mahalliy aholidan tayyor tobutlarni zo‘ravonlik bilan musodara qilib, vafot etganlarni dafn etishdagi an’anaviy marosimlarni taqiqlay boshladi.

Provinsiya bo‘ylab ko‘plab shaharlar rasmiylari joriy yilning sentabriga qadar “faqat krematsiya” siyosatini amalga oshirish muddatini qo‘ygan.

Ijtimoiy tarmoqlarda tarqalgan suratlar va videolarga ko‘ra, Xitoyda o‘tgan dam olish kunlari Ganchjou, Szyan va Ichun shahar okruglarida mahalliy aholi uylaridagi tobutlar mansabdor shaxslar tomonidan kuch bilan musodara etilgan.

Yog‘och tobutlardan hosil bo‘lgan ulkan tog‘ ekskavatorlar tomonidan yo‘q qilingan. Keksa kishilar tobutlarni saqlab qolishga urinib, ularga yotib olganligi ta’kidlanmoqda.

Mansabdorlar nafaqat tobutlar, balki boshqa an’anaviy marosimlar, jumladan, qabr toshlari va qog‘oz pullarni ham taqiqlagan.