Butunrossiya badiiy gimnastika federatsiyasi prezidenti, Rossiya termasi bosh murabbiyi, Rossiyada xizmat ko‘rsatgan murabbiy Irina Viner-Usmonova 70 yoshligini nishonlamoqda. Bu haqda “RIA Novosti” xabar qildi, deb yozadi “Sputnik O‘zbekiston”.
Irina Viner-Usmonova 1948-yilning 30-iyulida Samarqandda dunyoga kelgan. Uning otasi — Aleksandr Viner O‘zbekiston xalq rassomi, Rassomchilik akademiyasi a’zosi, onasi — Zoya Viner, shifokor.
Viner-Usmonova o‘z mehnat faoliyatini 1969-yilda Toshkent shahri olimpiya zaxiralari sport maktabida boshlagan. 1972-yildan 1992-yilgacha Toshkentda dastlab shahar terma jamoasi murabbiyi, keyinroq esa O‘zbekistonning badiiy gimnastika bo‘yicha terma jamoasi murabbiyi sifatida ishlagan.
Barselonadagi O‘yinlardan so‘ng Viner-Usmonova Moskvaga ko‘chib o‘tadi va Moskva shahar jismoniy tarbiya-sport birlashmasida ishlay boshlaydi. 2001-yildan Rossiyaning badiiy gimnastika bo‘yicha termasi bosh murabbiyi etib tayinlanadi.
Irina Viner mashhur biznesmen Alisher Usmonovga turmushga chiqqan, ular o‘smirlik yillaridan tanish bo‘lgan: Toshkentdagi bitta sport zalida shug‘ullangan. O‘g‘li Anton Viner — biznesmen.
Izoh (0)