Nukus aeroportining yangi terminali ochilish marosimida Bosh vazir birinchi o‘rinbosari Ochilboy Ramatov O‘zbekistonda samolyotlar aholi talablarini qondirish uchun kamlik qilayotganini ta’kidladi. Bu haqda Sputnik xabar bermoqda.
“Bunday chiroyli terminallar xalqimiz, kelayotgan mehmonlar uchun juda zarur, lekin ulardan to‘liq foydalanish darkor. Terminal soatiga 400 yo‘lovchiga xizmat qilsa-yu, kuniga 200 yo‘lovchi foydalanadigan bo‘lsa, terminal atigi 5 foizga ishlaydi. Qolgan 95 foizi esa to‘xtab turadi. Shuning uchun nima kerak — samolyotlar kerak ”, — dedi Bosh vazir oʻrinbosari.
Ramatov bugungi kunda “Oʻzbekiston havo yoʻllari” MAK juda katta ishlarni amalga oshirayotgani, shunday boʻlsa-da, kompaniya samolyotlari odamlardan kelib tushayotgan talablarni qondirish uchun kamlik qilayotganini aytdi.
“Shuning uchun xorijiy davlatlardan uchadigan samolyotlar masalasini hal qilishimiz kerak, Nukus aeroportida har yarim soatda samolyotlar uchib turishi kerak, negaki bugungi kunda aviatsiya manzilga eng tez olib boradigan va xavfsiz transport turiga kiradi. Toʻgʻri, poyezdlar koʻpaymoqda, lekin ular sekin yuradi, poyezd okeanning narigi tomoniga yoki Yevropaga olib borolmaydi”, — dedi Ramatov.
Shuningdek, Bosh vazir o‘rinbosari Oʻzbekistonda yaqin kelajakda bir nechta aviakompaniyalar ochilishi kutilayotgani, shuningdek, yangi aeroportlarni qurish masalasi ham kun tartibidan oʻrin olgani haqida aytib o‘tdi.
Eslatib o‘tamiz, Nukus xalqaro aeroportida yangi yo‘lovchi terminal ishga tushirilgan.
Izoh (0)