Нукус аэропортининг янги терминали очилиш маросимида Бош вазир биринчи ўринбосари Очилбой Раматов Ўзбекистонда самолётлар аҳоли талабларини қондириш учун камлик қилаётганини таъкидлади. Бу ҳақда Sputnik хабар бермоқда.
«Бундай чиройли терминаллар халқимиз, келаётган меҳмонлар учун жуда зарур, лекин улардан тўлиқ фойдаланиш даркор. Терминал соатига 400 йўловчига хизмат қилса-ю, кунига 200 йўловчи фойдаланадиган бўлса, терминал атиги 5 фоизга ишлайди. Қолган 95 фоизи эса тўхтаб туради. Шунинг учун нима керак — самолётлар керак », — деди Бош вазир ўринбосари.
Раматов бугунги кунда «Ўзбекистон ҳаво йўллари» МАК жуда катта ишларни амалга ошираётгани, шундай бўлса-да, компания самолётлари одамлардан келиб тушаётган талабларни қондириш учун камлик қилаётганини айтди.
«Шунинг учун хорижий давлатлардан учадиган самолётлар масаласини ҳал қилишимиз керак, Нукус аэропортида ҳар ярим соатда самолётлар учиб туриши керак, негаки бугунги кунда авиация манзилга энг тез олиб борадиган ва хавфсиз транспорт турига киради. Тўғри, поездлар кўпаймоқда, лекин улар секин юради, поезд океаннинг нариги томонига ёки Европага олиб боролмайди», — деди Раматов.
Шунингдек, Бош вазир ўринбосари Ўзбекистонда яқин келажакда бир нечта авиакомпаниялар очилиши кутилаётгани, шунингдек, янги аэропортларни қуриш масаласи ҳам кун тартибидан ўрин олгани ҳақида айтиб ўтди.
Эслатиб ўтамиз, Нукус халқаро аэропортида янги йўловчи терминал ишга туширилган.
Изоҳ (0)