“Obod qishloq” dasturi doirasida joriy yilda Samarqand viloyati tumanlaridagi 28 qishloq va Samarqand hamda Kattaqo‘rg‘on shahridagi 4 mahallada qurilish-obodonlashtirish ishlari olib borilmoqda. Bu haqda O‘zA xabar berdi.
Samarqand tumanidagi Mehrobod va Ilonsoy qishloqlari ham joriy yilga dasturga kiritilib, ushbu aholi punktlarida yakka tartibdagi uy-joylarni ta’mirlash, elektr, ichimlik suvi tarmoqlarini tortish va qayta tiklash, kanalizatsiya qudug‘i va yo‘llarni ta’mirlash, bozor va boshqa infratuzilma obyektlarini qurish belgilangan.
Jumladan, tumanning eng chekka hududida Mehrobod qishlog‘ida 2200 nafardan ziyod aholi istiqomat qiladi. Odamlar asosan, dehqonchilik, bog‘dorchilik bilan shug‘ullanadi. Qishloqqa yaqin parrandachilik korxonalarida mehnat qiladigan kishilar ham ko‘pchilikni tashkil etadi. Umuman, qishloqda yashovchi har bir kishi halol mehnat qilib, yaxshi turmush kechirishni istaydi va shunga intiladi.
Ammo hududdagi 410 ta oilaning 32 tasi hayot kechirayotgan to‘rt qavatli uyda zamon talabiga mos sharoit yaratib olish uchun aholining o‘z imkoniyati yetmaydi. O‘tgan asrning saksoninchi yillarda qurilgan bu uyda kanalizatsiya tarmog‘i mavjud emas. O‘z-o‘zidan ayonki, hojatxona ham yo‘q. Hatto ichimlik suvini ham aholi uy yonidagi krandan tashib keladi. Uyning tomidan chakka o‘tadi. Binoning tashqi qismi, yo‘laklar, xonadonlar ta’mirtalab.
— Shu sababdan ham ushbu qishloqni “Obod qishloq” dasturi asosida obod qilish rejalashtirildi, — deydi Samarqand tumani hokimi o‘rinbosari Qurbon Qurbonov. — Birinchi navbatda uyning tom qismi to‘liq ta’mirlandi. Yerto‘la tozalanib, tartibga keltirildi. Har bir kirish yo‘lagiga temir eshik qo‘yildi. Binoning tashqi ko‘rinishi to‘liq ta’mirlandi. Ayni paytda qishloqdagi aholi xonadonlari, yo‘llar, kommunikatsiya tarmoqlarini ta’mirlash, yangilashga kirishganmiz.
Dasturga ko‘ra, yil yakuniga qadar Mehrobodga 2,2 kilometr suv tarmog‘i tortilib, boshqa xonadonlar qatorida yuqoridagi ko‘p qavatli uy ham ichimlik suvi bilan ta’minlanadi. Hozirgacha bitta suv tarmog‘i qurilgan bo‘lsa, yana bir suv inshootini qurish ishlari olib borilmoqda. 2,5 kilometr elektr tarmoqlari yangilangan. Qishloq hududidagi 0,3 kilometr yo‘lga asfalt yotqizish, 2,1 kilometr yo‘lga qum-shag‘al aralashmasi tashlash ishlari bajarilgan. 60 dan ortiq xonadonga gaz ballonlari va ko‘mir tarqatilmoqda.
Shuningdek, qishloqda kanalizatsiya tarmog‘i tortish ko‘zda tutilgan. Hududdagi 200 dan ortiq xonadonlarni ham ta’mirlash belgilanib, hozirda tuman hokimligi va homiylar tomonidan ishlar boshlangan.
Bundan tashqari, qishloqdagi umumta’lim maktabini mukammal ta’mirlash, maktabgacha ta’lim muassasasi va qishloq vrachlik punkti binolarini rekonstruksiya qilish hamda ular uchun ichimlik suv inshooti qurish belgilangan. Ammo bu ishlarni bajarish uchun mablag‘ning to‘liq moliyalashtirilmaganligi tufayli belgilangan ishlarning yarmi ham amalga oshirilmagan. Chunki, bizga taqdim etilgan ma’lumotlarga ko‘ra, ayni vaqtda yuqoridagi obyektlar uchun sarflanadigan xarajatlarning 15 foizi moliyalashtirilgan. Bajarilgan qurilish-montaj ishlari esa 10 foizni tashkil etadi.
Eng ajablanarli holat, dastur asosida obod etilishi kerak bo‘lgan Mehrobodning zamonaviy loyihasi tegishli loyiha instituti tomonidan haligacha tayyorlab berilmagan. Axir, loyihasiz qanday qilib qishloqni obod qilish mumkin?
Bir so‘z bilan aytganda, qishloqda shu paytgacha bajarilgan ishlardan amalga oshirilishi lozim bo‘lgan yumushlar ko‘proq. Vaqt esa o‘tib bormoqda. Hademay yoz o‘tib kuz kelgach, yog‘in-sochin kunlar boshlanishi bilan qurilish ishlarini olib borish ham qiyin bo‘ladi.
Izoh (0)