O‘zbekiston tovarlarini eksport qilish uchun Rossiyada logistika markazini tashkil etish Vazirlar Mahkamasining 2018-yil 7-iyundagi “‘Investstroy’ OAJ faoliyatini yanada rivojlantirishga doir chora-tadbirlar to‘g‘risida”gi 430-sonli qarorida nazarda tutilgan. Bu haqda Norma xabar bermoqda.
Buxoro viloyati hokimligi va “O‘zbekoziqovqatxolding” XK Rossiya Federatsiyasidagi (Vladimir shahri) “Investstroy” OAJning ishlab chiqarish maydonlari negizida logistika markazini tashkil etish loyihasini ishlab chiqmoqda. Maqsad — O‘zbekiston tovarlari, shu jumladan, meva-sabzavot mahsulotlari eksportini oshirish. Shu munosabat bilan O‘zbekistonning OAJdagi 60 foiz miqdoridagi aksiyalari paketi bo‘yicha aksiyador huquqlari Buxoro viloyati hokimligiga (tasarruf etish huquqisiz) beriladi.
OAJ 1992-yildan buyon faoliyat ko‘rsatib kelayotgan O‘zbekiston—Rossiya qo‘shma korxonasi bo‘lib, asosiy faoliyat turi o‘ziga tegishli yoki ijaraga olingan yashash uchun mo‘ljallanmagan ko‘chmas mulkni ijaraga berish va boshqarish hisoblanadi. Shuningdek kompaniya sabzavotlar va qo‘ziqorinlarga qayta ishlov berish va ularni konservalash, ziravorlar va dorivor qo‘shimchalar ishlab chiqarish, ulgurji savdo va yuk tashish bilan shug‘ullanadi.
Yaqin orada boshqa ishlar qatori, mavjud bino, inshootlar rekonstruksiya qilinishi va yangi omborxona, sovutish xonalari qurilishini nazarda tutuvchi logistika markazini tashkil etish bo‘yicha “yo‘l xaritasi” ishlab chiqiladi. Shuningdek, logistika markazini tashkil etish loyihasi hisobga olingan holda “Investstroy”ning samaradorligini oshirish bo‘yicha biznes-reja qabul qilinadi.
Loyiha mahalliy budjetni ortiq darajada bajarishdan olingan daromadlar hisobiga moliyalashtirilib, keyinchalik mablag‘lar O‘zbekistonning kompaniya ustav kapitalidagi ulushini oshirishga yo‘naltiriladi.
“O‘zagroeksport” oldindan to‘lov to‘lamasdan, akkreditiv ochmasdan yoxud bank kafolatini rasmiylashtirmasdan turib meva-sabzavot mahsulotlarini “Investstroy” manziliga eksport qila oladi. Kompaniya maxsus ro‘yxatga kiritilishi natijasida ana shunga erishildi. Meva-sabzavot mahsulotlarini sotish bo‘yicha logistika markazini tashkil etish uchun ishlab chiqarish maydonlariga ega bo‘lgan, ustav kapitalida O‘zbekiston ulushi 50 foiz va undan ortiqni tashkil etadigan xorijiy kompaniyalar ham kelgusida unga kiritilishi mumkin.
Izoh (0)