“Mening fikrim” jamoaviy murojaatlar portalida jamoa xo‘jaliklarida ishlab, nafaqaga chiqqan shaxslarga davlat tomonidan to‘lanadigan nafaqalar tizimini qayta ko‘rib chiqish taklif etilgan murojaat joylandi.
Mazkur taklif muallif tomonidan quyidagicha izohlandi:
“Qonunchiligimizda jamoa xo‘jaligi (eski kolxozlar)da ishlab, nafaqaga chiqqan shaxslarga davlat tomonidan nafaqalar tayinlashda noaniqliklar mavjud. Ya’ni mazkur toifadagi nafaqaxo‘rlarga nafaqa tayinlash vaqtida ish stajini hisoblashda biroz adolatsizlik bilan yondoshilmoqda. Arxiv xujjatlariga asoslangan holda jamoa xo‘jaligida ishlagan shaxsning 365 kunlik mehnati bir yil hisobida ko‘rilmoqda. Natijada, agar jamoa xo‘jaligi a’zosi 25 yil ishlagan bo‘lsa 11 yil, 37 yil bo‘lgan bo‘lsa 23 yil, 40 yil ishlagan bo‘lsa 25 yil hisoblab chiqarilmoqda. Ajablanarlisi, ushbu muddatdan kelib chiqqan holda nafaqa miqdori tayinlanmoqda. Uzoq yillar umrini jamoa xo‘jaligi ishiga bag‘ishlagan oddiy odamlarga shu yo‘sinda pensiya tayinlanishi adolatdan bo‘larmikan?”
Taklif foydalanuvchilar tomonidan faol qo‘llab-quvvatlanmoqda. Jumladan, ulardan biri shunday deydi: “Juda ham o‘rinli murojaat. Ancha yillar kolxozlarda yaxshi lavozimlarda ishlab, xozirgi kunda arzimagan nafaqa olayotganlar juda ko‘p topiladi”.
Izoh (0)