Surxondaryo viloyati hokimligi, viloyatdagi oliy ta’lim muassasalari, kasb-hunar ta’limi, viloyat xalq ta’limi boshqarmalari hamkorligida o‘tkazilgan tadbirda ta’lim jarayoniga o‘qitishning zamonaviy innovatsion pedagogik uslublarini, axborot-kommunikatsiya texnologiyalarini keng joriy etish borasida amalga oshirilayotgan ishlar muhokama etildi. Bu haqda O‘zA xabar berdi.
Ta’lim tizimida amalga oshirilayotgan islohotlar Surxondaryoda ham o‘z samarasini ko‘rsatdi. Avvallari viloyatda bitta oliy ta’lim muassasasi faoliyat yuritgan bo‘lsa, ayni paytda ularning soni oltitaga yetdi. Islom Karimov nomidagi Toshkent davlat texnika, Toshkent davlat agrar, Nizomiy nomidagi Toshkent davlat pedagogika universitetlari, Toshkent tibbiyot akademiyasining filiallari, Denov tumanida esa Termiz davlat universitetining filiali tashkil etilib, yuqori salohiyatli kadrlar tayyorlash yo‘lga qo‘yildi.
Viloyatda xalq xo‘jaligi tarmoqlarini o‘rganish oliy ta’lim tizimida yangi yo‘nalishlar bo‘yicha malakali mutaxassislar tayyorlash lozimligini ko‘rsatdi. 2018/2019-o‘quv yilidan Termiz davlat universitetida rus filologiyasi, arxitektura va qurilish, kimyo-texnologiya fakultetlari tashkil etilmoqda. Maktabgacha ta’lim, psixologiya yo‘nalishlari bo‘yicha kadrlar tayyorlash yo‘lga qo‘yilmoqda. Islom Karimov nomidagi Toshkent davlat texnika universitetining Termiz filialida energetika, Toshkent tibbiyot akademiyasining Termiz filialida pediatriya mutaxassisligi bo‘yicha abituriyentlardan hujjatlar qabul qilishga hozirlik ko‘rilmoqda.
Shuningdek, Toshkent davlat agrar va Nizomiy nomidagi Toshkent davlat pedagogika universitetlarining Termiz filiallarida ham ta’lim va qishloq xo‘jaligi tarmoqlari uchun yangi yo‘nalishlarda mutaxassislar tayyorlash ko‘zda tutilgan. Barcha ta’lim muassasalarida qabul kvotalari oshirilgan.
Anjumanda OAV vakillariga viloyat kasb-hunar ta’limi, xalq ta’limi boshqarmalari tizimidagi o‘zgarish va yangilanishlar xususida atroflicha ma’lumot berildi. Oliy ta’lim muassasalarida test sinovlarini o‘tkazish bilan bog‘liq masalalarga e’tibor qaratildi.
Izoh (0)