NASA astronomlari 3-iyun kuni Yer atmosferasida yonib ketib, Afrika osmonida portlagan asteroidni aniqlashga muvaffaq bo‘ldi. Bu haqda NASA reaktiv harakati laboratoriyasiga asoslanib, “RIA Novosti” xabar berdi.
“Mazkur asteroid Yerga urilguniga qadar aniqlangan uchinchi obyektga aylandi. Shuningdek, biz ikkinchi marotaba osmon jismi bizning sayyoramizga urilishidan ancha oldin ushbu hodisani bashorat qilishga muvaffaq bo‘ldik”, — deydi laboratoriya xodimi Pol Chodas.
Deyarli har kuni Yer atrofidan bir yoki ikkita yirik asteroid uchib o‘tadi. Bu turdagi kichik osmon jismlari jiddiy xavf tug‘dirmaydi, biroq astronomlar 2013-yilda Chelyabinskka qulagan meteoritdan so‘ng, ularni faol tarzda kuzatib keladi.
2017-yilda NASA mutaxassislari ommaga diametri 30 metrga teng asteroidlarning Yerga yaqinlashishini aniqlashga qodir Scout tizimini namoyish etgandi. Chodas’ning aytishicha, ushbu tizim o‘tgan dam olish kuni favqulodda tekshiruvdan o‘tgan va 2018 LA nomini olgan asteroidni aniqlashga muvaffaq bo‘lgan.
Izoh (0)