10-may kuni O‘zbekiston Prezidentining Afg‘oniston bo‘yicha maxsus vakili Ismatulla Irgashev boshchiligidagi delegatsiya Kuvaytga tashrifi chog‘ida mamlakat bosh vazirining birinchi o‘rinbosari, mudofaa vaziri shayx Nosir Saboh al-Ahmad as-Saboh va tashqi ishlar vaziri o‘rinbosari Ali Sulaymon as-Sayid bilan uchrashuvlar va muzokaralar o‘tkazdi. Bu haqda TIV matbuot xizmati xabar berdi.

Ikki tomon kun tartibidagi asosiy masalalar muhokama qilindi.

Kuvayt rahbarlari O‘zbekiston Prezidenti Shavkat Mirziyoyevning uzoqni ko‘zlagan tashqi va ichki siyosatini qo‘llab-quvvatladilar va uning rahbarligida amalga oshirilayotgan ijtimoiy-iqtisodiy islohotlarni yuqori baholadi.

Muzokaralarda hamkorlikni yanada rivojlantirishdan tomonlar manfaatdor ekanligi tasdiqlandi. Kuvayt kompaniyalari O‘zbekiston iqtisodiyotining turli tarmoqlariga investitsiya kiritshga tayyor ekanligi qayd etildi. Shu nuqtai nazardan Savdo-iqtisodiy va ilmiy-texnik hamkorlik bo‘yicha hukumatlararo komissiyasining birinchi majlisini 2018-yil iyul oyida Toshkent shahrida o‘tkazish hamda Kuvayt va O‘zbekiston o‘rtasida to‘g‘ridan to‘g‘ri aviaqatnov ochilishi muhim ahamiyatga ega.

Kuvayt tomoni O‘zbekiston hukumatining Kuvayt fuqarolariga soddalashtirilgan tartibda viza berish bo‘yicha qarorini minnatdorlik bilan qayd etdi.

Uchrashuvlarda mamlakatda madaniy-gumanitar sohadagi hamkorlikning aniq yo‘nalishlari, Kuvayt universiteti huzuridagi Tilllarni o‘rganish markazida O‘zbekiston vakillari o‘qitish istiqbollari, shuningdek, arab tili o‘qituvchilarini mamlakat ta’lim muassasalarida dars berish uchun jo‘natish masalalari ham muhokama qilindi.