Oliy Majlis Senatining 14-yalpi majlisi oldidan Fan, ta’lim, madaniyat va sport masalalari qo‘mitasi yig‘ilishida “Ta’lim to‘g‘risida”gi qonun umumiy o‘rta ta’limga doir qismining Sirdaryo viloyatidagi ijrosini o‘rganish natijalari ko‘rib chiqildi. Bu haqda Senat axborot xizmati
xabar bermoqda.
Foto: Senat axborot xizmatiSenatorlar viloyatda qonun ijrosini o‘rganish asnosida aniqlangan kamchiliklar, xususan, umumiy o‘rta ta’lim tizimida hal etilishi lozim bo‘lgan dolzarb masalalar, yo‘l qo‘yilgan xato va kamchiliklarga e’tibor qaratdi. Jumladan, o‘quvchilarining fanlarni o‘zlashtirish darajasi talab darajasida emasligi ta’kidlandi.
2017/2018-o‘quv yilining o‘tgan davri mobaynida o‘tkazilgan monitoring natijalariga ko‘ra, o‘quvchilarning o‘zlashtirish darajasi o‘rtacha 52 foizni tashkil etdi, xolos. Jumladan, o‘quvchilarning matematika, informatika, fizika, kimyo, biologiya, geografiya, tarix, rus va ingliz tili fanlaridan o‘zlashtirish darajasi pastligicha qolmoqda.
Umumta’lim maktablaridagi ma’naviy-ma’rifiy ishlar samaradorligi ham yetarli, deb bo‘lmaydi. “Oila, mahalla, ta’lim muassasasi” hududiy jamoat kengashlari faoliyati talab darajasida yo‘lga qo‘yilmagan. Ko‘p hollarda tadbirlar nomigagina o‘tkazilgan. Tarbiyasi og‘ir, huquqbuzarlik sodir etgan va sodir etishga moyil, notinch oilalar farzandlari bo‘lgan o‘quvchilar bilan tegishli profilaktika tadbirlarni o‘tkazishda sustkashlikka yo‘l qo‘yilgan. Oqibatda maktab o‘quvchilari tomonidan sodir qilingan jinoyatlar soni oshgan.
Amaliyot Sirdaryo viloyatidagi umumta’lim maktablarida yuqori malakali pedagog kadrlarga bo‘lgan ehtiyoj yuqoriligicha qolayotganini ko‘rsatmoqda. Maktablarda jami 211 nafar pedagog xodim o‘rni vakant. 2018/2019-o‘quv yilida 11-sinf ochilishi munosabati bilan qo‘shimcha 380 nafar o‘qituvchiga ehtiyoj yuzaga keladi.
Muhokamalar davomida qonunni ijro etish, umumiy o‘rta ta’lim tizimini har tomonlama rivojlantirish bo‘yicha manfaatdor idoralar mas’uliyatini kuchaytirish, bunda parlament va jamoatchilik nazorati institutlaridan samarali foydalanish lozimligiga alohida e’tibor qaratildi.
Izoh (0)