O‘zbekistonda qora oynali avtomobilda harakatlanish mumkin emas. Hatto chet elliklarga ham

So‘nggi vaqtlarda O‘zbekistonning yirik shaharlari ko‘chalarida oynalari qoraytirilgan avtomobillar ko‘paydi. O‘zAning yozishicha, ushbu holat odamlar orasida “qoraytirilgan oynali mashinada harakatlanish mumkin bo‘ldimi?”, degan savolning kelib chiqishiga sabab bo‘lgan.

O‘zA sayti (www.uza.uz) mazkur masala yuzasidan Yo‘l harakati xavfsizligi boshqarmasi (YHXB) xodimlaridan izoh oldi:

Ma’muriy javobgarlik to‘g‘risidagi kodeksning 126-moddasida qoraytirilgan oynali avtomobilda harakatlanish taqiqlangani ko‘rsatilgan. Qoidani buzgan haydovchiga nisbatan uning transport vositasini vaqtinchalik saqlash jarima maydoniga evakuatsiya qilish chorasi ko‘riladi. Bundan tashqari, mazkur qoidabuzarlik eng kam ish haqining bir barobari miqdoridagi jarima bilan jazolanadi. Agarda qoidabuzarlik yana takrorlansa, jarima eng kam ish haqining ikki barobari miqdorida belgilanadi.

Ushbu qoida O‘zbekiston hududida harakatlanuvchi barcha avtomobil egalariga tegishli. Joriy yilda mazkur qoidani buzish holatlari sodir etilgan. Qo‘shni davlatdan o‘z mashinasida tashrif buyurgan sayyohlar ham mazkur qoidaga amal qilishlari lozim. O‘zbekistonga kirib kelayotgan xorijiy avtomashina egasi chegarada bu qoidalar haqida birinchi galda ogohlantiriladi va tushuntiriladi. Qoida buzilgan taqdirda haydovchiga nisbatan tegishli chora ko‘riladi.

O‘zbekiston va Tojikiston o‘rtasida chegaradan o‘tish tartib-taomilini yengillashtirish bo‘yicha kelishuv imzolanib, u kuchga kirgach, ko‘plab tojikistonliklar mehmon bo‘lib O‘zbekiston shaharlariga tashrif buyurmoqda. Ularning ko‘pchiligi o‘z avtomobillarida O‘zbekistonga kirib kelayotgan bo‘lib, aksariyat hollarda bu avtomobillarning oynalari qoraytirilganini ko‘rish mumkin.

Ijtimoiy tarmoqlarda davlat raqami Tojikistonniki bo‘lgan, oynalari qoraytirilgan qimmatbaho xorijiy avtomobillarning Toshkent va Samarqand shahri ko‘chalari bo‘ylab harakatlanayotgani tasvirlangan ko‘plab foto va videolar tarqalgan.