Сўнгги вақтларда Ўзбекистоннинг йирик шаҳарлари кўчаларида ойналари қорайтирилган автомобиллар кўпайди. ЎзАнинг ёзишича, ушбу ҳолат одамлар орасида «қорайтирилган ойнали машинада ҳаракатланиш мумкин бўлдими?», деган саволнинг келиб чиқишига сабаб бўлган.
ЎзА сайти (www.uza.uz) мазкур масала юзасидан Йўл ҳаракати хавфсизлиги бошқармаси (ЙҲХБ) ходимларидан изоҳ олди:
Маъмурий жавобгарлик тўғрисидаги кодекснинг 126-моддасида қорайтирилган ойнали автомобилда ҳаракатланиш тақиқлангани кўрсатилган. Қоидани бузган ҳайдовчига нисбатан унинг транспорт воситасини вақтинчалик сақлаш жарима майдонига эвакуация қилиш чораси кўрилади. Бундан ташқари, мазкур қоидабузарлик энг кам иш ҳақининг бир баробари миқдоридаги жарима билан жазоланади. Агарда қоидабузарлик яна такрорланса, жарима энг кам иш ҳақининг икки баробари миқдорида белгиланади.ЎзАнинг қўшимча қилишича, Ўзбекистон ҳудудида мазкур чеклов элчихоналарга тегишли автомашиналарга таъсир қилмайди.Ушбу қоида Ўзбекистон ҳудудида ҳаракатланувчи барча автомобиль эгаларига тегишли. Жорий йилда мазкур қоидани бузиш ҳолатлари содир этилган. Қўшни давлатдан ўз машинасида ташриф буюрган сайёҳлар ҳам мазкур қоидага амал қилишлари лозим. Ўзбекистонга кириб келаётган хорижий автомашина эгаси чегарада бу қоидалар ҳақида биринчи галда огоҳлантирилади ва тушунтирилади. Қоида бузилган тақдирда ҳайдовчига нисбатан тегишли чора кўрилади.
Ўзбекистон ва Тожикистон ўртасида чегарадан ўтиш тартиб-таомилини енгиллаштириш бўйича келишув имзоланиб, у кучга киргач, кўплаб тожикистонликлар меҳмон бўлиб Ўзбекистон шаҳарларига ташриф буюрмоқда. Уларнинг кўпчилиги ўз автомобилларида Ўзбекистонга кириб келаётган бўлиб, аксарият ҳолларда бу автомобилларнинг ойналари қорайтирилганини кўриш мумкин.
Ижтимоий тармоқларда давлат рақами Тожикистонники бўлган, ойналари қорайтирилган қимматбаҳо хорижий автомобилларнинг Тошкент ва Самарқанд шаҳри кўчалари бўйлаб ҳаракатланаётгани тасвирланган кўплаб фото ва видеолар тарқалган.
Изоҳ (0)