Bulldozer Group restoranlar xoldingi O‘zbekiston bozoriga kirishni mo‘ljallamoqda

Bulldozer Group restoranlar xoldingi O‘zbekiston bozoriga kirib kelmoqda. Bu haqda, o‘z manbalariga tayanib, Spot nashri xabar berdi.

Mazkur xolding Toshkentdagi eng yirik restoran majmualaridan birini boshqarishni rejalashtirmoqda va ayni vaqtda unga boshqaruvchi hamda bosh oshpaz qidirmoqda.

Kompaniya Rossiyadan o‘ziga kerakli xodimlarni topib, ularni Toshkentga olib kelish niyatida. Buning uchun kompaniya o‘z xodimlariga Toshkentdan kvartira taqdim etadi hamda ularning Rossiyadan uchib kelishi uchun zarur xarajatlarni qoplab beradi.

Gap yangi restoran kompleksini yaratish yoki mavjud birorta tarmoqni sotib olish haqida ketayaptimi — hozircha noma’lum.

Bulldozer Group — Aleksandr Orlov (“Yilning eng yaxshi tadbirkori”, “Yilning eng yosh tadbirkori”, “Yil restoratori”) tomonidan asos solingan kompaniya hisoblanadi. Xolding bir nechta davlatlarda joylashgan restoran komplekslari boshqarish bilan shug‘ullanadi.