“Manchester Siti” Angliya Liga Kubogida zafar quchdi. Londondagi “Uembli” stadionida kechgan final o‘yinida “Arsenal”ga qarshi saf tortgan “shaharliklar” yirik g‘alabaga erishdi.
Bellashuvda Serxio Aguero hisobni ochgan bo‘lsa, keyinchalik Vensan Kompani, David Silva kabilar o‘zini ko‘rsatdi. Venger jamoasidan esa bu gollarga javob beradigan hech kim topilmadi.
Xosep Gvardiola jamoasi mavsum avvalida 4 ta fronda kurashni boshlagan bo‘lsa, shularning faqatgina 1 tasida muvaffaqiyatsizlikka uchradi. Angliya Kubogida jamoa quyi liga vakili “Uigan”dan yengilib, turnirni tark etgandi.
Liga Kubogini esa “Siti” “Vest Bromvich”ni 2:1 hisobida taslim qilishdan boshlagandi. Keyinroq “Vulverhempton” penaltilar seriyasiga ko‘ra ortda qoldirildi. “Lester” bilan ham xuddi shunday bo‘ldi, o‘yinning asosiy vaqtida g‘olibni aniqlab bo‘lmadi. Yarim finalda esa “Bristol Siti” avvaliga 2:1, keyin 3:2 hisoblarida taslim qilindi.
Angliya Liga Kubogida eng ko‘p “Liverpul” zafar quchgan — 8 marta. “Manchester Yunayted”, “Aston Villa”, “Chelsi”da sovrinlar soni 5 tadan edi. Kecha “Manchester Siti” ular safiga qo‘shilib oldi. “Arsenal” esa bu turnirni 2 marta yutgan.
Angliya Liga Kubogi Final 25-fevral, yakshanba
Izoh (0)