MOQ prezidenti Umid Ahmadjonov rahbarligida Janubiy Koreyaning Pxyonchxan shahriga yetib borgan qishki Olimpiada bo‘yicha O‘zbekiston delegatsiyasi musobaqalarga tayyor. Bu haqda tashkilot matbuot xizmati xabar berdi.

Foto: MOQ

Qishki Olimpiadada O‘zbekiston sharafini ikki sportchi himoya qiladi. Komil To‘xtayev allaqachon olimpiya shaharchasiga yetib kelgan bo‘lsa, ayni paytda AQShda o‘quv-mashg‘ulot yig‘inlarini davom ettirayotgan Misha Ge Janubiy Koreyaga 11-fevral kuni yetib boradi.

Ge 16-fevral kuni Gangneung Ice Arena muz saroyida figurali uchishning qisqa dasturida chiqish qiladi, 17-fevralda esa erkin dasturda o‘z omadini sinab ko‘radi.

Foto: MOQ

Komiljon To‘xtayev 18-fevral kuni tog‘ chang‘isining gigant slalom bahslarida ishtirok etadi. 22-fevralda uni slalom bo‘yicha musobaqa kutib turibdi. Tog‘ chang‘isi bo‘yicha bellashuvlar Yongpyong Alpine Centre majmuasida bo‘lib o‘tadi.

Ertaga — 8-fevral kuni Milliy olimpiya qo‘mitasi prezidenti Umid Ahmadjonov boshchiligidagi delegatsiya Olimpiya shaharchasida O‘zbekiston bayrog‘ini ko‘tarish rasmiy marosimida ishtirok etadi. 9-fevral kuni esa Pxyonchxanda XXIII qishki Olimpiadaning tantanali ochilish marosimi o‘tkaziladi. Mazkur tadbirda ham MOQ prezidenti bevosita qatnashadi.

Foto: MOQ