Farg‘onada ayol mast holdagi erining oyoq-qo‘llarini bog‘lab uning o‘limiga sababchi bo‘ldi

Farg‘onada mast holatdagi erini bog‘lab qo‘yib, uning o‘limiga sababchi bo‘lgan ayolga hukm o‘qildi. Bu haqda Oliy sud matbuot kotibi xabar berdi.

Fuqaro Jo‘raboyev nafaqaga chiqib, yoshi 70 ga qarab ketayotgan paytda ham spirtli ichimlik ichishga ruju qo‘ygan. Buning natijasida uning xonadonida tez-tez janjal sodir bo‘lib turgan. Oiladagi oxirgi mojaro oldidan ham Jo‘raboyev uyga yana mast holatda kirib kelib, ayoli bilan janjallashgan, turmush o‘rtog‘ini haqorat qilgan, oshxona pichog‘ini olib, o‘ldirish bilan tahdid qilgan holda ortidan quvgan. Ayol tomorqa tomonga o‘tib yashirinib olgach, erkak ko‘chaga chiqib ketgan va yana spirtli ichimlik ichib, kechki payt qaytib kelgan.

Jo‘raboyeva turmush o‘rtog‘ining uyqudan uyg‘onib, janjal ko‘tarmasligi va yana ko‘chaga chiqib ketmasligini ko‘zlab, hovlida turgan chilvir ip bilan erining ikki qo‘lini pastki bilak sohasidan, oyoqlarini son va to‘pig‘idan bog‘lab qo‘ygan.

Birozdan keyin erkak uyg‘onib, oyoq-qo‘llari bog‘langanini ko‘rgan va baqir-chaqir qilgan. Turmush o‘rtog‘ining vajohatidan qo‘rqqan ayol erining qo‘l-oyoqlarini bog‘liqligicha qoldirgan.

Jo‘raboyeva suddagi ko‘rsatmasida voqealar rivoji haqida gapirar ekan, keyinroq arqonni yechish uchun kirganida eri xurrak otib uxlab yotganini, yana birozdan keyin esa ovozi chiqmay qolganini maʼlum qilgan. Bu orada ayol yaqinlari va shifokorlarni yordamga chaqirgan.

Tezkor chaqiruv bo‘yicha xonadonga yetib kelgan shifokorlar tekshirib ko‘rib, Jo‘raboyevning vafot etganini aytgan. Sud-tibbiy ekspertizasining xulosasiga ko‘ra, erkakning o‘limiga tanasidagi jarohatlar hamda organizmda kislorodning kamayishi, karbonat angidridning ko‘payishi sabab bo‘lgan.

Holat yuzasidan jinoyat ishi ochilib, tergov harakatlari olib borilgach, ish sudda ko‘rib chiqilgan va ayolga nisbatan 2 yil muddatga ozodlikni cheklash jazosi tayinlangan.

Bundan oldin Andijon viloyatida shar’iy nikohdagi turmush o‘rtog‘ini sintetik ip yordamida bo‘g‘ib o‘ldirgan va murdasini uyining hojatxonasi chuquriga tashlab yuborgan 25 yoshli ayolga sud hukmi o‘qilgandi.