“Technovation Girls” dasturi mentori va kiberxavfsizlik bo‘yicha loyiha menejeri Darya Soy o‘z tajribasi bilan o‘rtoqlashar ekan, IT sohasida xotin-qizlar loyihalarini qo‘llab-quvvatlashning muhimligi haqida gapirdi.
IT sohasida ishlash nafaqat kod va texnik ko‘nikmalar, balki ilhom va qo‘llab-quvvatlash bilan bog‘liq. Xalqaro texnologiya kompaniyalaridan birida loyihalar ustida ishlayotgan Darya Soy bunga amin va endilikda u tajribali mutaxassis sifatida qizlarga o‘z loyihalarini amalga oshirishda yordam beradi hamda sohani o‘zgartirishga hissa qo‘shadi.
Technovation Girls loyihasidagi rolingizni qanday ta’riflagan bo‘lardingiz?
Farg‘onalik jamoalar murabbiyi sifatida faoliyatimda ikkinchi yil. Men uchun, birinchi navbatda, bu shaxsiy voqea. Oddiy davlat maktabi bitiruvchisi sifatida, oddiy o‘qituvchilar oilasidan bo‘lib, men IT sohasida o‘z karyeramni rivojlantirdim va endi men tug‘ilgan shahrimdagi qizlarga bu yo‘nalishda yordam berishni va qo‘llab-quvvatlashni xohlayman. Murabbiylikdan tashqari, men o‘z shaxsiy namunam bilan jamoani IT sohasida karyerani boshlashga ilhomlantira olishimga umid qilaman.
Sizningcha, IT sohasida loyihalarni ishlab chiqmoqchi bo‘lgan qizlar uchun qaysi ko‘nikma va bilimlar muhimroq?
Menimcha, bunda asosiy omil qiziquvchanlik hisoblanadi, shuning natijasida qizlar bu loyihaga qo‘shilib, oxirigacha borishadi. Jamoada ishlash qobiliyati va mas’uliyat hissi ham muhimdir, chunki boshqa ishtirokchilar bilan aloqa o‘rnatish va o‘z vazifalarini bajarish loyihani muvaffaqiyatli yakunlash uchun bo‘ladi.
Shunday loyihalar haqida gapirib bersangiz. Ularni amalga oshirishda qanday qiyinchiliklar bo‘ldi va buni qanday yengishdi ?
Farg‘onaning LEN jamoasi bilan ishlayapman . Ishtirokchilar qo‘shimcha ta’lim markazlarini qidirish uchun ilova ishlab chiqmoqdalar, unda siz oflayn darslarda qatnashib bilim olishingiz va shaxsiy so‘rovnomalar asosida eng qulay variantlarni tanlashingiz mumkin.
Menimcha, birinchi qiyinchilik loyihaning yetakchi g‘oyasi haqida qaror qabul qilish bo‘ldi . Qizlar juda ko‘p g‘oyalarga ega edilar va jamoa birgalikda nimalar qila olishini aniqlashlari kerak edi.
Biz qizlarning nimalarga eng katta ehtiyoji borligini va ularga qanday ilova yetishmayotganini aniqlash uchun bir nechta uchrashuvlarda muhokama qildik. Ishonamizki, agar katta qiziqish bo‘lsagina, yaxshi mahsulotlarni yaratish mumkin.
Kasbiy faoliyatingizni qanday boshlagansiz va hozir nimalar ustida ish olib boryapsiz?
Oliy Iqtisodiyot maktabi menga nimaga qiziqayotganimni va kelajakda o‘zimni qayerda ko‘rishimni tushunishda yordam berdi. Kursdoshlarim va men Technovation Girls’ga o‘xshash turli loyihalarda qatnashdik, yirik kompaniyalar xodimlari bilan uchrashdik va ularning ofislariga ekskursiyalarga bordik.
Turli sohalarni o‘rganish tufayli, magistrlik dasturida men IT sohasida rivojlanishni xohlayotganimni angladim. Bir vaqtlar men bir nechta banklarda amaliyot o‘taganman va IT konsaltingida o‘z o‘rnimni topishga harakat qilganman.
2018-yilda men Yandex Taxi rivojlantirish jamoasiga kichik menejer sifatida qo‘shildim va yillar davomida o‘z vaqtida va oldindan rejalashtirilgan natijalarga erishish uchun guruhlarni muvofiqlashtirib, loyiha ofisining rahbariga aylandim.
Turli loyihalar orasida foydalanuvchilarga qulaylik yaratish maqsadida bir nechta xizmatlar birlashtirilgan ilova Super App’ni yaratishda ham ishtirok etdim. Bu ko‘plab ishtirokchilarni qamrab olgan yirik loyiha edi va men jamoaga o‘z hissamni qo‘shganimdan xursandman.
Biz hozirda foydalanuvchi va hamkorlarimizning shaxsiy ma’lumotlarini himoya qilishga e’tibor qaratmoqdamiz. Kompaniyamiz mahalliy qonunchilik va xalqaro standartlarga, shuningdek, eng yaxshi global standartlar, masalan – umumiy ma’lumotlarni himoya qilish to‘g‘risidagi reglamentga (GDPR) rioya qilgan holda bu sohaga e’tibor qaratyapmiz. Demak, maxfiy ma’lumotlar sizib chiqish va noto‘g‘ri foydalanishdan himoyalangan.
Biz foydalanuvchi ma’lumotlarining xavfsizligini ta’minlash va firibgarlarning bizning infratuzilmamizga kirishiga yo‘l qo‘ymaslik uchun turli vositalar va jarayonlarni ishlab chiqamiz. Mening vazifam shunday loyihalarni muvofiqlashtirish va bu borada o‘z maqsadimga erishishdir.
Sizning IT sohasidagi tajribangiz mentorlikka bo‘lgan yondashuvingizga qanday ta’sir qiladi? Bir-biriga o‘xshash prinsiplar yoki usullar bormi?
Ha, albatta bor. Menimcha, ish faoliyatida IT-loyihalarni boshqarish va Technovation Girls’da mentorlik bir-biriga o‘xshash. Menejerning ham, murabbiyning ham asosiy vazifasi mavjud resurslar asosida jamoani to‘g‘ri yo‘naltirish, loyihani o‘z vaqtida bajarish uchun sharoit yaratishdir.
Bu sohadagi ayollarning qanday yutuqlari sizni ilhomlantiradi?
Birinchidan, bular men shaxsan biladigan va o‘z maqsadiga erishish uchun nimalarni boshdan kechirish mumkinligi haqida tasavvurga ega bo‘lgan odamlardir.
Misol uchun, mening hamkasblarim orasida kichik shaharlarda tug‘ilgan va bizning sohamizga mutlaqo aloqasi bo‘lmagan universitetlarni, masalan, geologiya yoki iqtisod kabi sohalarda tugatgan ishlab chiquvchilar va menejerlar bor.
Ular bir vaqtlar noldan boshlab IT-sanoatiga kirishdilar va endi Yandex’da yirik loyihalarni boshqarishadi. Inson chin dildan biror narsani xohlasa va unga harakat qilsa, hamma narsaga erishishi mumkinligini isbotlaydigan qizlarga qoyil qolaman .
Sizningcha, ayollarni IT sohasiga qanday jalb qilish mumkin?
Mamlakatning turli hududlarida Technovation Girls kabi loyihalarning ishga tushirilishi va IT sohasida ishlayotgan ayollar bilan shaxsan muloqot qilish imkoniyati sizga sohani yaxshiroq o‘rganishga, o‘zingiz uchun kelajagingizni o‘ylab ko‘rishga va o‘qish va rivojlanishda ongli ravishda tanlov qilishga yordam beradi.
Technovation Girls’da ishtirok etgan qizlarda qanday o‘zgarishlar yoki muvaffaqiyatlarni sezasiz?
Men bilan ishlaydigan jamoa a’zolarining ular uchun yangi sohani o‘rganishlari, hamma narsani tezda o‘zlashtirishlari meni hayratda qoldirdi! Ular ko‘p narsani bilishadi va uddalay olishadi, ular har xil vositalar yordamida qunt bilan ishlashadi. Misol uchun, ular yaqinda o‘z jamoalari haqida video ssenariy yozishga qaror qilishdi va bitta uchrashuvda hamma narsani mukammal reja qilishdi, meni ularning tashabbusi va rivojlanish istaklari hayratlantiradi.
Dasturni tugatgandan keyin siz va ishtirokchilarning yana qanday rejalari bor?
Biz chindan ham loyihani rivojlantirishni davom ettirish istagidamiz, chunki biz o‘z tajribamizdan kelib chiqib ma’lumot va qo‘shimcha ta’lim uchun imkoniyatlar yetishmasligini bilamiz. Bizning bu boradagi taklifimiz Farg‘onadagi maktab o‘quvchilariga yordam beradi, deb o‘ylaymiz.
Sizningcha, qizlarning IT sohasida rivojlanishi uchun keyingi eng muhim qadam nima?
Loyihani tugatgan qizlar kelajakda nima bilan shug‘ullanishlari haqida qaror qilayotganda, men ularga universitetdagi tegishli yo‘nalishni tanlashni, qo‘shimcha ta’limga e’tibor berishni va universitetdan tashqarida ham o‘z loyihalarini yaratishni tavsiya qilaman.
Ko‘p millionli mahsulotlar qanday yaratilganligini ko‘rish, buni o‘rganish va keyin to‘plangan bilimlarni shaxsiy yoki korporativ loyihalarda qo‘llash uchun yirik kompaniyalarda amaliyot o‘tash muhimdir.
Sheriklik huquqi asosida.
Izoh (0)